പ്രയാഗ് രാജ്: ഉത്തര്‍പ്രദേശില്‍ എം.എല്‍.എയുടെ വധക്കേസിലെ സാക്ഷിയെ കൊലപ്പെടുത്തിയ കേസില്‍ ആരോപണ വിധേയനായ സമാജ് വാദി പാര്‍ട്ടി മുന്‍ നേതാവ് അത്തിഫ് അഹമ്മദിന്റെ അടുത്ത സഹായി സഫര്‍ അഹമ്മദിന്റെ വീട് ബുള്‍ഡോസര്‍ ഉപയോഗിച്ച് തകര്‍ത്തു. വീട് അനധികൃതമായി നിര്‍മിച്ചതാണെന്ന് ചൂണ്ടിക്കാട്ടി പ്രയാഗ് രാജ് ഭരണകൂടമാണ് പൊലിസ് സന്നാഹത്തോടെ പൊളിക്കല്‍ തുടങ്ങിയത്.

2005ല്‍ ബി.എസ്.പി എം.എല്‍.എയായിരുന്ന രാജു പാലിനെ വെടിവെച്ച് കൊന്നക്കേസിലെ പ്രധാന സാക്ഷിയായിരുന്ന ഉമേഷ് പാലിനെ കഴിഞ്ഞ ദിവസം രണ്ടംഗ സംഘം കൊലപ്പെടുത്തിയിരുന്നു. പ്രയാഗ് രാജില്‍ വെച്ച് ബോംബ് എറിഞ്ഞും വെടിവെച്ചുമാണ് ഉമേഷിനെ കൊലപ്പെടുത്തിയത്.

ഉമേഷ് പാലിനെ കൊലപ്പെടുത്തിയ സംഘത്തിലെ ഒരാളെ പൊലിസ് ഏറ്റുമുട്ടലില്‍ വധിക്കുകയും മറ്റൊരാളെ അറസ്റ്റ് ചെയ്യുകയും ചെയ്തിരുന്നു. കൊലപാതകത്തിന് പിന്നില്‍ അത്തിഫ് അഹമ്മദ് ആണെന്ന് പൊലിസ് പറയുന്നു.

രാജു പാല്‍ വധക്കേസില്‍ ഇപ്പോള്‍ തടവുശിക്ഷ അനുഭവിക്കുകയാണ് മുന്‍ ലോക്‌സഭാംഗമായിരുന്ന അത്തിഫ് അഹമ്മദ്. ഗുണ്ടാ തലവനില്‍ നിന്ന് രാഷ്ട്രീയക്കാരനായ വ്യക്തിയാണ് അത്തിഫ്. യു.പിയിലെ ഭുല്‍പൂര്‍ മണ്ഡലത്തില്‍ നിന്ന് സമാജ് വാദി പാര്‍ട്ടി സ്ഥാനാര്‍ഥിയായാണ് പതിനാലാം ലോക്‌സഭയിലേക്ക് തെരഞ്ഞെടുക്കപ്പെട്ടത്.