2022 November 30 Wednesday
ലോകത്തില്‍ മാറ്റങ്ങള്‍ വരണമെന്ന് ഏവരും ആഗ്രഹിക്കുന്നു. എന്നാല്‍ സ്വയം മാറ്റത്തിനു വിധേയനവാന്‍ ആരും തയ്യാറല്ല താനും. ലിയോ ടോള്‍സ്റ്റോയ്

തെരഞ്ഞെടുപ്പില്‍ തോല്‍ക്കുമെന്ന് പേടി, കെജ്‌രിവാളിനെ കൊല്ലാന്‍ ബി.ജെ.പി ഗൂഢാലോചന നടത്തുന്നു; മനോജ് തിവാരിക്ക് പങ്കെന്നും മനീഷ് സിസോദിയ

ന്യൂഡല്‍ഹി: ഗുജറാത്തിലെയും ഡല്‍ഹി മുനിസിപ്പല്‍ കോര്‍പറേഷനിലെയും തെരഞ്ഞെടുപ്പ് പരാജയം ഭയന്ന് മുഖ്യമന്ത്രി അരവിന്ദ് കെജ്‌രിവാളിനെ കൊലപ്പെടുത്താന്‍ ബി.ജെ.പി ഗൂഢാലോചന നടത്തിയെന്ന് ആം ആദ്മി നേതാവും ഡല്‍ഹി ഉപമുഖ്യമന്ത്രിയുമായ മനീഷ് സിസോദിയ.
ബി.ജെ.പി നേതാവും ഡല്‍ഹി എം.പിയുമായ മനോജ് തിവാരിക്ക് അതില്‍ പങ്കുണ്ടെന്നും മനീഷ് സിസോദിയ ആരോപിച്ചു.
എന്നാല്‍, ഇത്തരം നിസാര രാഷ്ട്രീയത്തെ ആം ആദ്മി പാര്‍ട്ടി ഭയപ്പെടുന്നില്ലെന്നും, അവരുടെ ഗുണ്ടായിസത്തിന് ജനങ്ങള്‍ മറുപടി നല്‍കുമെന്നും സിസോദിയ പറഞ്ഞു.

‘ഗുജറാത്ത്, എം.സി.ഡി തെരഞ്ഞെടുപ്പുകളിലെ തോല്‍വി ഭയം കാരണം അരവിന്ദ് കെജ്‌രിവാളിനെ കൊല്ലാന്‍ ബി.ജെ.പി ഗൂഢാലോചന നടത്തുകയാണ്. അവരുടെ എം.പി മനോജ് തിവാരി കെജ്‌രിവാളിനെ ആക്രമിക്കാന്‍ തന്റെ ഗുണ്ടകളോട് പരസ്യമായി ആവശ്യപ്പെടുന്നു. അദ്ദേഹം പൂര്‍ണമായ ആസൂത്രണം നടത്തി. അവരുടെ നിസാര രാഷ്ട്രീയത്തെ ആം ആദ്മി പാര്‍ട്ടി ഭയപ്പെടുന്നില്ല. അവരുടെ ഗുണ്ടായിസത്തിന് ജനങ്ങള്‍ മറുപടി നല്‍കും’ മനീഷ് സിസോദിയ ട്വീറ്റ് ചെയ്തു.

കെജ്‌രിവാളിന്റെ സുരക്ഷയെക്കുറിച്ച് ആശങ്ക പ്രകടിപ്പിച്ച തിവാരിയുടെ ട്വീറ്റുകള്‍ക്ക് മറുപടിയായാണ് അദ്ദേഹത്തിന്റെ പരാമര്‍ശങ്ങള്‍ വന്നത്.

‘അരവിന്ദ് കെജ്‌രിവാളിന്റെ സുരക്ഷയെക്കുറിച്ച് എനിക്ക് ആശങ്കയുണ്ട്. തുടര്‍ച്ചയായ അഴിമതി, ‘ടിക്കറ്റ് വില്‍പ്പന’, ബലാത്സംഗ പ്രതികളുമായുള്ള സൗഹൃദം, ജയിലിലെ മസാജ് എന്നിവ കാരണം എ.എ.പി പ്രവര്‍ത്തകര്‍ രോഷാകുലരാണ്. അവരുടെ എം.എല്‍.എമാരും മര്‍ദ്ദിക്കപ്പെടുന്നുണ്ട്. ഡല്‍ഹി മുഖ്യമന്ത്രിക്ക് അത് സംഭവിക്കാതിരിക്കട്ടെ,’ എന്നായിരുന്നു മനീഷ് തിവാരിയുടെ ട്വീറ്റ്.

കള്ളപ്പണക്കേസില്‍ ജയിലില്‍ കഴിയുന്ന ഡല്‍ഹി ആരോഗ്യമന്ത്രി സത്യേന്ദര്‍ ജെയിന്, വി.ഐ.പി. പരിഗണന ലഭിക്കുന്നതിന്റെ വീഡിയോയോ പുറത്തുവന്നത് വലിയ വിവാദങ്ങള്‍ക്ക് ഇടയാക്കിയിരുന്നു. എന്നാല്‍, അത് ഫിസിയോ തെറാപ്പിയാണ്. മസാജോ വി.ഐ.പി. പരിഗണനയോ അല്ലെന്നാണ് കെജ്‌രിവാള്‍ പ്രതികരിച്ചത്. ഡല്‍ഹി മുനിസിപ്പല്‍ കോര്‍പറേഷന്‍ തെരഞ്ഞെടുപ്പിനുള്ള ടിക്കറ്റ് എ.എ.പി വില്‍ക്കുന്നുവെന്ന ആരോപണം ഉന്നയിച്ച് മുന്‍ ആം ആദ്മി പാര്‍ട്ടി പ്രവര്‍ത്തകന്‍ ചിത്രീകരിച്ച് വീഡിയോ ബി.ജെ.പി പുറത്തുവിട്ടിരുന്നു.

ആം ആദ്മി പാര്‍ട്ടിക്കെതിരെയുള്ള ഈ ആരോപണങ്ങളെല്ലാം തെരഞ്ഞെടുപ്പില്‍ ഉപയോഗിക്കാനാണ് ബി.ജെ.പി നീക്കം. ഡിസംബര്‍ ഒന്നിനും അഞ്ചിനുമായി രണ്ട് ഘട്ടങ്ങളായാണ് ഗുജറാത്ത് തെരഞ്ഞെടുപ്പ് നടക്കുന്നത്. അതേസമയം, ഡിസംബര്‍ നാലിനാണ് ഡല്‍ഹി മുന്‍സിപ്പല്‍ കോര്‍പ്പറേഷന്‍ തെരഞ്ഞെടുപ്പ് നടക്കുക.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

Advt.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Comments are closed for this post.