പട്‌ന: കൊവിഡ് ബാധിച്ച് മരിച്ചവരുടെ കണക്കുകളില്‍ മാറ്റം വരുത്തി ബിഹാര്‍ സര്‍ക്കാര്‍. 9249 പേര്‍ കൊവിഡ് ബാധിച്ച് മരിച്ചുവെന്നാണ് സര്‍ക്കാറിന്റെ പുതിയ കണക്ക്.

കഴിഞ്ഞ ദിവസം വരെ 5,500ല്‍ താഴെ ആളുകള്‍ മാത്രമാണ് കൊവിഡ് ബാധിച്ച് മരണത്തിന് കീഴടങ്ങിയതെന്നായിരുന്നു ബിഹാര്‍ സര്‍ക്കാറിന്റെ കണക്ക് കൂട്ടല്‍.എന്നാല്‍, 3,951 മരണങ്ങള്‍ പുതുതായി കൂട്ടിച്ചേര്‍ക്കുകയായിരുന്നു.

മരണക്കണക്ക് ബിഹാര്‍ സര്‍ക്കാര്‍ മറച്ചു വെക്കുകയാണെന്ന് ആരോപണമുയര്‍ന്നതിനെ തുടര്‍ന്ന് യഥാര്‍ത്ഥ കണക്ക് സമര്‍പ്പിക്കാന്‍ പട്‌ന കോടതി ആവശ്യപ്പെട്ടിരുന്നു. ഏപ്രില്‍ മെയ് മാസത്തിലുണ്ടായ കൊവിഡ് രണ്ടാം തരംഗത്തില്‍ എത്രപേര്‍ മരിച്ചെന്ന കണക്ക് സമര്‍പ്പിക്കാനാണ് കോടതി ആവശ്യപ്പെട്ടത്. പിന്നാലെ നടത്തിയ വിശദമായ പരിശോധനയിലാണ് ബിഹാറില്‍ കൂടുതല്‍ പേര്‍ കൊവിഡ് ബാധിച്ച് മരിച്ചിട്ടുണ്ടെന്ന് വ്യക്തമായത്.

എന്നാല്‍ പുതുതായി കൂട്ടിച്ചേര്‍ത്ത മരണങ്ങള്‍ ഏത് ജില്ലയില്‍ നിന്നുള്ളതാണെന്ന് സര്‍ക്കാര്‍ ഇനിയും വ്യക്തമാക്കിയിട്ടില്ല. രണ്ടാം തരംഗത്തില്‍ ഏകദേശം 8000 പേര്‍ക്ക് ജീവന്‍ നഷ്ടമായെന്നാണ് സര്‍ക്കാര്‍ കണക്കാക്കുന്നത്.

കൊവിഡ് രോഗമുക്തി നേടിയവരുടെ എണ്ണത്തിലും ബിഹാര്‍ ആരോഗ്യമന്ത്രാലയം മാറ്റം വരുത്തിയിട്ടുണ്ട്. 7,01,234 പേര്‍ രോഗമുക്തി നേടിയെന്നാണ് പുതിയ കണക്ക്. കഴിഞ്ഞ ദിവസം ഇത് 6,98,397 ആയിരുന്നു.