ന്യൂഡല്‍ഹി: ഒമ്പതു ദിവസത്തെ ഇടവേളയ്ക്കു ശേഷം രാഹുല്‍ ഗാന്ധിയുടെ ഭാരത് ജോഡോ യാത്ര പുനഃരാരംഭിക്കുന്നു. ഉത്തര്‍പ്രദേശില്‍നിന്നാണ് യാത്ര തുടങ്ങുന്നത്.

വെറുപ്പിനെതിരെ രാജ്യത്തെ ഒന്നിപ്പിക്കാന്‍ ഇതുവരെ 110 ദിവസം കൊണ്ട് 3,000 കിലോമീറ്റര്‍ ദൂരമാണ് വിവിധ സംസ്ഥാനങ്ങളിലൂടെ രാഹുലും കൂട്ടരും സഞ്ചരിച്ചത്. 2022 സെപ്റ്റംബര്‍ 7ന് കന്യാകുമാരിയില്‍നിന്ന് ആരംഭിച്ച യാത്ര, തമിഴ്‌നാട്, കേരളം, കര്‍ണാടക, ആന്ധ്രപ്രദേശ്, തെലങ്കാന, മധ്യപ്രദേശ്, രാജസ്ഥാന്‍, മഹാരാഷ്ട്ര, ഹരിയാന എന്നീ സംസ്ഥാനങ്ങളിലൂടെ കടന്നുപോയി. ജമ്മു കശ്മീരിലാണ് യാത്രയുടെ സമാപനം.

ഇന്ത്യയുടെ ചരിത്രത്തില്‍ ആദ്യമായാണ് ഒരു രാഷ്ട്രീയ നേതാവ് ഇത്രയും ദൈര്‍ഘ്യമേറിയ കാല്‍നട യാത്ര നടത്തുന്നതെന്നു കോണ്‍ഗ്രസ് പറയുന്നു. ജനുവരി 26ന് ശ്രീനഗറില്‍ യാത്ര സമാപിക്കുമ്പോള്‍, ‘ഹാഥ് സെ ഹാഥ് ജോഡോ’ എന്ന പ്രചാരണ പരിപാടിയും പാര്‍ട്ടി ആസൂത്രണം ചെയ്തിട്ടുണ്ട്. എഐസിസി ജനറല്‍ സെക്രട്ടറി പ്രിയങ്ക ഗാന്ധിക്കാണ് ഇതിന്റെ ചുമതല. സ്ത്രീകളെ പ്രത്യേകം ലക്ഷ്യമിടുന്നതാണ് ക്യാംപെയ്ന്‍.