വിദ്യയെ കണ്ടെത്താന്‍ സൈബര്‍ സെല്ലിന്റെ സഹായം തേടി അഗളി പൊലിസ്

പാലക്കാട്: വ്യാജരേഖ ചമയ്ക്കല്‍ കേസില്‍ ഒളിവില്‍ കഴിയുന്ന എസ്.എഫ്.ഐ മുന്‍ നേതാവ് വിദ്യയെ കണ്ടെത്താന്‍ സൈബര്‍ സെല്ലിന്റെ സഹായം തേടി അഗളി പൊലിസ്. വിദ്യയുടെ ചില അടുത്ത സുഹൃത്തുക്കളും അവരുടെ ഫോണുകളും പൊലിസ് നിരീക്ഷണത്തിലാണ്. മുന്‍പ് എറണാകുളം സെന്‍ട്രല്‍ പൊലീസ് അന്വേഷിച്ച കേസ് ഇപ്പോള്‍ അഗളി പൊലിസ് ആണ് അന്വേഷിക്കുന്നത്. അഗളി പൊലിസ് ഇന്നലെ കാസര്‍കോട്ടെ വിദ്യയുടെ വീട്ടില്‍ എത്തി തെരച്ചില്‍ നടത്തിയിരുന്നു. വ്യാജ രേഖയുടെ അസല്‍ പകര്‍പ്പ് ലഭിക്കാനാണ് ഇന്നലെ പരിശോധന നടത്തിയത്. ജാമ്യമില്ലാ വകുപ്പ് പ്രകാരമാണ് വിദ്യക്കെതിരെ കേസെടുത്തിരിക്കുന്നത്. ഒളിവില്‍ കഴിയുന്ന വിദ്യ മൂന്‍കൂര്‍ ജാമ്യത്തിനായി ശ്രമിക്കുന്നുണ്ട്.

അതിനിടെ, സംഭവത്തില്‍ അഗളി ഡി.വൈ.എസ്.പി നാളെ മഹാരാജാസ് കോളേജിലെത്തി മലയാളം വകുപ്പ് അധ്യാപകരുടെയും പ്രിന്‍സിപ്പാളിന്റെയും മൊഴി എടുക്കും. അട്ടപ്പാടി ഗവ.കോളേജ് പ്രിന്‍സിപ്പാളിന്റെ മൊഴിയും നാളെ രേഖപ്പെടുത്തും. വിദ്യയുടെ പി.എച്ച്.ഡി പ്രവേശനം സംബന്ധിച്ച ആരോപണത്തില്‍ കാലടി സര്‍വകലാശാലയുടെ അന്വേഷണം നാളെ ആരംഭിച്ചേക്കും. സിന്‍ഡിക്കേറ്റ് ചുമതലപ്പെടുത്തിയ ഉപസമിതിയും സര്‍വകലാശാ ലീഗല്‍ സ്റ്റാന്‍ഡിംഗ് കമ്മിറ്റിയുമാണ് ഇത് സംബന്ധിച്ച അന്വേഷണം നടത്തുന്നത്.

സംവരണ മാനദണ്ഡങ്ങള്‍ ലംഘിച്ചാണോ വിദ്യയുടെ പ്രവേശനം നടന്നത് എന്നതാകും പ്രധാനമായും പരിശോധിക്കുക. പി.എച്ച്.ഡി പ്രവേശനവുമായി ബന്ധപ്പെട്ടുളള രേഖകള്‍ മലയാളം വിഭാഗത്തില്‍ നിന്ന് ഉടന്‍ ശേഖരിക്കും. കെ വിദ്യ എം.ഫില്‍ പഠിച്ചപ്പോഴും ചട്ടലംഘനം നടന്നു എന്ന പുതിയ ആരോപണത്തിലും മലയാളം വിഭാഗം വിവരങ്ങള്‍ തേടുന്നുണ്ട്. 2019ലാണ് വിദ്യ കാലടി സംസ്‌കൃത സര്‍വകലാശാലയില്‍ പി.എച്ച്.ഡി പ്രവേശനം നേടിയത്. സംവരണ തത്വങ്ങള്‍ അട്ടിമറിച്ചാണ് സീറ്റ് നല്‍കിയതെന്നാരോപിച്ച് അക്കാലയളവില്‍ തന്നെ ആക്ഷേപം ഉയര്‍ന്നിരുന്നു.