മലപ്പുറം പാകിസ്ഥാനെ പോലെ തീവ്രവാദികളെ സൃഷ്ടിക്കുന്ന ജില്ലയെന്ന്: മതവിദ്വേഷം നടത്തിയ കേസില്‍ യൂട്യൂബര്‍ അറസ്റ്റില്‍

നിലമ്പൂര്‍: യൂട്യൂബിലൂടെ മതവിദ്വേഷം നടത്തിയ കേസില്‍ ഒരാള്‍ പോലിസ് പിടിയില്‍. പൂക്കോട്ടുംപാടം സ്വദേശി വി കെ ബൈജു(44) വിനെയാണ് പെരിന്തല്‍മണ്ണ പൊലിസ് അറസ്റ്റ് ചെയ്തത്. പെരിന്തല്‍മണ്ണ മനഴി ബസ് സ്റ്റാന്‍ഡിനടുത്ത് ആര്യായാസ് ഹോട്ടല്‍ ഉടമ അബ്ദുറഹ്മാനെതിരെ യൂട്യൂബില്‍ മതവിദ്വേഷ പ്രചാരണം നടത്തിയ സംഭവത്തിലാണ് അറസ്റ്റ്.
ആര്യായാസ് എന്ന പേരില്‍ വെജിറ്റേറിയന്‍ ഹോട്ടല്‍ നടത്തുന്നത് മുസ്ലിമാണെന്നും ഹോട്ടല്‍ മാനേജറുടെ മേശപ്പുറത്ത് ഗണപതി വിഗ്രഹത്തിന് സമാനമായ ഒരു പ്രതിമ കണ്ടെത്തിയതുമാണ് ഇയാളെ പ്രകോപിതനാക്കിയത്. മലപ്പുറം പാക്കിസ്ഥാനിലെ പോലെയുള്ള തീവ്രവാദികളെ സൃഷ്ടിക്കുന്ന ജില്ലയാണെന്നും വീഡിയോയില്‍ പരാമര്‍ശമുണ്ട്. ഒരു മതവിഭാഗത്തെ വളരെ മോശമായി ചിത്രീകരിക്കുന്ന തരത്തിലായിരുന്നു വീഡിയോ. മൂന്നു ലക്ഷത്തിലധികം പേര്‍ വീഡിയോ വീഡിയോ കണ്ടു കഴിഞ്ഞു. ആയിരത്തിനടുത്ത് ആളുകള്‍ പങ്കുവെച്ചിട്ടുണ്ട്. ഇയാള്‍ക്കെതിരെ നടപടി ആവശ്യപ്പെട്ട് നിരവധിപേര്‍ രംഗത്തെത്തിയിരുന്നു.