പാലക്കാട്: ഗര്‍ഭിണിയാണെന്നും പ്രസവിച്ച കുഞ്ഞ് ഐ.സി.യു.വിലാണെന്നും ഭര്‍തൃവീട്ടില്‍ നുണപറഞ്ഞ യുവതി ഒടുവില്‍ നവജാത ശിശുവിനെ തട്ടിക്കൊണ്ടുവന്നു പ്രശ്‌നം പരിഹരിക്കാന്‍ നടത്തിയ ശ്രമത്തില്‍ കുടുങ്ങി. ഒടുവില്‍ യുവതിയെ പൊലിസ് അറസ്റ്റ് ചെയ്തു.
നവജാത ശിശുവിനെ തട്ടിക്കൊണ്ടുപോയ സംഭവത്തില്‍ പാലക്കാട് കൊടുവായൂര്‍ സ്വദേശി ഷമീനയെയാണ് പൊലിസ് അറസ്റ്റ് ചെയ്തത്. പൊളളാച്ചിയില്‍ നിന്നാണ് നാല് ദിവസം പ്രായമായ കുഞ്ഞിനെ ഇവര്‍ തട്ടിക്കൊണ്ടുപോയത്.
താന്‍ ഏപ്രില്‍ 22ന് പ്രസവിച്ചുവെന്നായിരുന്നു ഷമീന ഭര്‍തൃ വീട്ടില്‍ പറഞ്ഞത്. കുട്ടി ഐ.സി.യുവിലാണെന്ന് വീട്ടുകാരെ വിശ്വസിപ്പിക്കുകയും ചെയ്തു. ഭര്‍ത്താവ് മണികണ്ഠനും കുട്ടിയെ കണ്ടിട്ടില്ലായിരുന്നു. ഇന്നലെ രാവിലെയാണ് പൊള്ളാച്ചി സ്വദേശികളുടെ കുട്ടിയെ ഇവര്‍ തട്ടിക്കൊണ്ടുവന്നത്. ആശുപത്രിയില്‍ നിന്നുള്ള സിസിടിവി ദൃശ്യങ്ങളാണ് അന്വേഷണത്തിന് സഹായകരമായത്.