ക്യൂ.ആര്‍ സുരക്ഷിതമാക്കാം; ഇക്കാര്യങ്ങള്‍ ശ്രദ്ധിച്ചാല്‍ മതി; മുന്നറിയിപ്പുമായി കേരള പൊലിസ്

നമ്മുടെ നിത്യജീവിതത്തിന്റെ ഭാഗമായി മാറിയിരിക്കുകയാണ് ക്യൂ.ആര്‍ കോഡുകള്‍. ഡിജിറ്റല്‍ പണമിടപാടുകള്‍ വ്യാപകമായതോടെയാണ് ക്യൂ.ആര്‍ കോഡുകള്‍ക്ക് വ്യാപക പ്രചാരണം ലഭിക്കുന്നത്. സൂക്ഷിച്ച് കൈകാര്യം ചെയ്തില്ലെങ്കില്‍ പല തട്ടിപ്പുകള്‍ക്കും ഇരയാവാനും ഈ കോഡുകള്‍ തന്നെ മതിയെന്നതാണ് വസ്തുത.

അതുകൊണ്ട് തന്നെ സുരക്ഷിതമായ രീതിയില്‍ ക്യൂ.ആര്‍ കോഡുകള്‍ ഉപയോഗിക്കാനുള്ള മാര്‍ഗ നിര്‍ദേശവുമായി രംഗത്തെത്തിയിരിക്കുകയാണ് കേരള പൊലിസ്. ക്യൂ.ആര്‍ ഉപയോഗിച്ച് ലിങ്ക് തുറക്കുമ്പോള്‍ യു.ആര്‍.എല്‍ സുരക്ഷിതാണെന്ന് ഉറപ്പുവരുത്തനമെന്നാണ് ഫെയ്‌സ്ബുക്കില്‍ പങ്കുവെച്ച കുറിപ്പില്‍ പൊലിസ് പറയുന്നത്. അതുപോലെ തന്നെ ഇ-മെയിലിലെയും എസ്.എം.എസിലെയും സംശകരമായ ലിങ്കുകള്‍ ക്ലിക്ക് ചെയ്യരുതെന്നും പൊലിസ് മുന്നറിയിപ്പ് നല്‍കുന്നു.

കുറിപ്പിന്റെ പൂര്‍ണ്ണരൂപം

ആധുനികജീവിതത്തില്‍ QR കോഡുകളുടെ സ്ഥാനം ഒഴിവാക്കാനാവാത്ത വിധം മാറിക്കഴിഞ്ഞു. QR കോഡുകള്‍ സ്‌കാന്‍ ചെയ്യുമ്പോള്‍ അറിഞ്ഞിരിക്കേണ്ട ചില വസ്തുതകള്‍ ഉണ്ട്.

1. QR കോഡ് ഉപയോഗിച്ച് ഒരു ലിങ്ക് തുറക്കുമ്പോള്‍, URL സുരക്ഷിതമാണെന്നും വിശ്വസനീയമായ ഉറവിടത്തില്‍ നിന്നാണ് വരുന്നതെന്നും ഉറപ്പാക്കേണ്ടത് പ്രധാനമാണ്.

2. ഇമെയിലിലെയും SMS ലെ യും സംശയകരമായ ലിങ്കുകള്‍ ക്ലിക്കുചെയ്യുന്നത് അപകടകരമെന്നതുപോലെ QR കോഡുകള്‍ നയിക്കുന്ന URL-കള്‍ എല്ലാം ശരിയാകണമെന്നില്ല. ഫിഷിംഗ് വെബ്സൈറ്റിലേക്ക് നിങ്ങളെ കൊണ്ടുപോകാന്‍ അതിനു കഴിഞ്ഞേക്കും.

3. QR കോഡ് സ്‌കാനര്‍ APP- സെറ്റിംഗ്‌സില്‍ ‘open URLs automatically’ എന്ന ഓപ്ഷന്‍ നമ്മുടെ യുക്താനുസരണം സെറ്റ് ചെയ്യാം. നമ്മുടെ അറിവോടെ വെബ്സൈറ്റുകളില്‍ പ്രവേശിക്കാനുള്ള അനുമതി നല്‍കുന്നതാണ് ഉചിതം.

4. അറിയപ്പെടുന്ന സേവന ദാതാക്കളില്‍ നിന്ന് മാത്രം QR കോഡ് ജനറേറ്റ് ചെയ്യുക.

5. QR കോഡ് ഉപയോഗിച്ചുള്ള ഇടപാടുകള്‍ നടത്തിയ ഉടനെ അക്കൗണ്ടിലെ ട്രാന്‍സാക്ഷന്‍ വിശദാംശങ്ങള്‍ പരിശോധിച്ച് ഉറപ്പുവരുത്തുക.

6. കസ്റ്റം QR കോഡ് ആപ്പുകള്‍ ഡൗണ്‍ലോഡ് ചെയ്യുന്നത് ഒഴിവാക്കുക..

7. QR കോഡ് സ്‌കാന്‍ ചെയ്യാന്‍ കഴിയുന്നതും ഉപകരണ നിര്‍മ്മാതാവ് നല്‍കുന്ന വിശ്വസനീയമായ ആപ്പുകള്‍ ഉപയോഗിക്കുക.

8. ഏതൊരു ടെക്‌നോളജിക്കും ഗുണത്തിനൊപ്പം ചില ദൂഷ്യവശങ്ങള്‍ കൂടിയുണ്ടെന്ന് മനസിലാക്കുന്നത് കൂടുതല്‍ കരുതലോടെ ഇവയെ സമീപിക്കാന്‍ സഹായിക്കും.