2021 March 09 Tuesday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

തൃശൂര്‍ പുല്ലഴിയില്‍ യു.ഡി.എഫിന് അട്ടിമറി വിജയം; കോഴിക്കോട് മാവൂരില്‍ ഭരണം നിലനിര്‍ത്തി, കളമശ്ശേരിയില്‍ എല്‍.ഡി.എഫ്

തൃശൂര്‍/കൊച്ചി: തൃശൂര്‍ പുല്ലഴിയില്‍ നടന്ന ഉപതെരഞ്ഞെടുപ്പില്‍ യുഡി.എഫിന് അട്ടിമറി ജയം. എല്‍.ഡി.എഫിന്റെ സിറ്റിങ് സീറ്റ് യു.ഡി.എഫ് പിടിച്ചെടുത്തു. 47ാം വാര്‍ഡില്‍ യു.ഡി.എഫ് സ്ഥാനാര്‍ത്ഥി രാമനാഥന്‍ വിജയിച്ചത് 1009 വോട്ടിന്റെ ഭൂരിപക്ഷത്തിന്. ഇതോടെ തൃശൂരില്‍ ഇരുമുന്നണികളും ഒപ്പത്തിനൊപ്പം എത്തി. എല്‍.ഡി.എഫ് 25 യു.ഡി.എഫ് 24. യു.ഡി.എഫ് വിമതന്റെ പിന്തുണയോടെയാണ് നിലവില്‍ ഇവിടെ എല്‍.ഡി.എഫ് ഭരിക്കുന്നത്.

കോഴിക്കോട് മാവൂരിലും യു.ഡി.എഫ്. വാവൂര്‍ പഞ്ചായത്തിലെ 11ാം വാര്‍ഡില്‍ യു.ഡി.എഫ് സ്ഥാനാര്‍ത്ഥി കെ.സി വാസന്തി 217 വോട്ടിന് വിജയിച്ചു. ഇതോടെ ഇവിടെ യു.ഡി.എഫ് ഭരണം ഉറപ്പിച്ചു. ആര്‍. എം.പി അംഗത്തിന്റെ പിന്തുണയോടെ യു.ഡി.എഫ് ആണ് ഭരിച്ചിരുന്നത്.

കളമശ്ശേരി നഗരസഭയിലെ 37ാം വാര്‍ഡില്‍ നടന്ന ഉപതെരഞ്ഞെടുപ്പില്‍ എല്‍.ഡി.എഫിന് അട്ടിമറി ജയം. ഇടത് സ്വതന്ത്രന്‍ റഫീഖ് മരക്കാറാണ് മുസ്‌ലിം ലീഗിന്റെ സിറ്റിങ് സീറ്റില്‍ 64 വോട്ടിന്റെ ഭൂരിപക്ഷത്തില്‍ വിജയിച്ചത്. സ്ഥാനാര്‍ഥിയുടെ മരണത്തെ തുടര്‍ന്നാണ് ഉപതെരഞ്ഞെടുപ്പ് നടന്നത്.

മുസ്‌ലിം ലീഗ് സ്ഥാനാര്‍ഥിക്കെതിരെ കോണ്‍ഗ്രസ് വിമതന്‍ മല്‍സരിച്ചതാണ് യു.ഡി.എഫിന് തിരിച്ചടിയായത്. അഞ്ചു സ്ഥാനാര്‍ഥികള്‍ മല്‍സര രംഗത്തുണ്ടായിരുന്നതും വോട്ട് ഭിന്നിക്കാന്‍ ഇടയാക്കി.

എല്‍.ഡി.എഫിന് 20ഉം യു.ഡി.എഫിന് 21ഉം ആണ് കക്ഷിനില. ഭരണമാറ്റത്തിന് നിലവില്‍ സാധ്യതയില്ല. ഇന്നലെ നടന്ന വോട്ടെടുപ്പില്‍ 74. 52 ശതമാനം പോളിങ് രേഖപ്പെടുത്തിയിരുന്നു.

കൊല്ലം പന്മന ഗ്രാമപഞ്ചായത്ത് പറമ്പിമുക്ക് വാര്‍ഡില്‍ യു.ഡി.എഫ് വിജയിച്ചു. യു.ഡി.എഫ് സ്ഥാനാര്‍ഥി നൗഫല്‍ 323 വോട്ടിന്റെ ഭൂരിപക്ഷത്തിലാണ് വിജയിച്ചത്.

Advt.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.