കൊച്ചി: മഹാരാജാസ് കോളേജിലെ എസ്.എഫ്.ഐ നേതാവ് അഭിമന്യു വധക്കേസിലെ കുറ്റപത്രത്തിലെ വിവരങ്ങള്‍ പുറത്ത്. 16 പ്രതികള്‍ക്കെതിരെയാണ് കുറ്റപത്രം. ഇവര്‍ എസ്.ഡി.പി.ഐ, പോപ്പുലര്‍ ഫ്രണ്ട് പ്രവര്‍ത്തകരാണ്. ഇതില്‍ ഏഴു പ്രതികള്‍ ഒളിവിലാണ്.

അഭിമന്യുവിനെ കാണിച്ച് കൊടുത്തത് ഒന്നാം പ്രതി മുഹമ്മദാണ് .പത്താം പ്രതി സഹലാണ് അഭിമന്യുവിനെ കുത്തിയതെന്നും കുറ്റപത്രം പറയുന്നു. അര്‍ജ്ജുനെ പിടിച്ചു നിര്‍ത്തിയത് പതിനൊന്നാം പ്രതി ജിസാല്‍. കുത്തിയത് പന്ത്രണ്ടാം പ്രതി ഷാഹിം. പ്രതികളെത്തിയത് അഞ്ച് ബൈക്കുകളിലാണെന്നും കുറ്റപത്രത്തിലുണ്ട്.

പ്രതികള്‍ തെളിവുകള്‍ നശിപ്പിച്ചുവെന്ന് കുറ്റപത്രത്തില്‍ പറയുന്നു. തങ്ങളുടെ രക്തം കലര്‍ന്ന വസ്ത്രങ്ങളും മൊബൈല്‍ ഫോണും ആയുധങ്ങളും കണ്ടെടുക്കാനാവാത്ത വിധം നശിപ്പിച്ചുവെന്നാണ് പറയുന്നത്.