പ്യോംങ്യാംഗ്: നോര്‍ത്ത് കൊറിയയില്‍ കിം ജോങ് ഉന്നിന്റെ മകളുടെ പേര് മറ്റു പെണ്‍കുട്ടികള്‍ക്ക് നല്‍കരുതെന്ന് വിചിത്ര ഉത്തരവ് പുറപ്പെടുവിച്ചതായി റിപ്പോര്‍ട്ട്.ജു ഏ എന്നാണ് കിം ജോങ് ഉന്നിന്റെ മകളുടെ പേര്. ഇതേ പേരുളള പെണ്‍കുട്ടികളെയും സ്ത്രീകളെയുമാണ് പേര് മാറ്റാന്‍ നിര്‍ബന്ധിക്കുന്നതെന്ന് ഫോക്‌സ് ന്യൂസ് റിപ്പോര്‍ട്ട് ചെയ്തു.

ഏകദേശം പത്ത് വയസ്സ് പ്രായമുളള കുട്ടിയാണ് ജു ഏ.റേഡിയോ ഫ്രീ ഏഷ്യയെ ഉദ്ധരിക്കുന്ന ഉത്തര കൊറിയയില്‍ നിന്നുള്ള അജ്ഞാത ഉറവിടങ്ങളാണ് വാര്‍ത്ത റിപ്പോര്‍ട്ട് ചെയ്തത്. പ്രാദേശിക സര്‍ക്കാരുകള്‍ ജു ഏ എന്ന് പേരുള്ള സ്ത്രീകളോട് അവരുടെ ജനന സര്‍ട്ടിഫിക്കറ്റ് മാറ്റാന്‍ നിര്‍ദേശിച്ചതായാണ് റിപ്പോര്‍ട്ടുകള്‍. ജിയോങ്ജു സിറ്റിയിലെ സുരക്ഷാ മന്ത്രാലയം ജു ഏ എന്ന് പേരുളള സ്ത്രീകളെ ഓഫീസിലേക്ക് വിളിപ്പിച്ചതായും ഒരാഴ്ചക്കകം അവരുടെ പേരുകള്‍ മാറ്റണമെന്ന് നിര്‍ദേശിച്ചതായും റിപ്പോര്‍ട്ടില്‍ പറയുന്നു.

ഈയിടെ സൈനിക പരേഡില്‍ കിം മകള്‍ക്കൊപ്പം പ്രത്യക്ഷപ്പെട്ടിരുന്നു. കഴിഞ്ഞ വര്‍ഷം നവംബറിലാണ് ജൂവിനെ ആദ്യമായി മാധ്യമത്തിനും ലോകത്തിനും പരിചയപ്പെടുത്തിയത്.

ഉത്തരകൊറിയയില്‍ നേതാക്കളുടെയും അവരുടെ അടുത്ത കുടുംബാംങ്ങളുടെയും പേരുകള്‍ ഉപയോഗിക്കുന്നതില്‍ നിന്ന് ആളുകളെ തടഞ്ഞിരുന്നതായി 2014ല്‍ സൗത്ത് ചൈന മോണിംഗ് പോസ്റ്റ് റിപ്പോര്‍ട്ട് ചെയ്തിരുന്നു. അതേപോലെ കിം ജോങ് ഉന്നിന്റെ പേര് ഉപയോഗിക്കരുതെന്നും ജനങ്ങള്‍ക്ക് നിര്‍ദേശം നല്‍കിയിരുന്നു.