പാന്‍കാര്‍ഡ് ആധാറുമായി നിര്‍ബന്ധമായും ലിങ്ക് ചെയ്യേണ്ട അവസാന തിയ്യതി 2023 മാര്‍ച്ച് 31 ആണെന്ന് എല്ലാവര്‍ക്കും അറിയാമല്ലോ.. ഇങ്ങനെ ചെയ്തില്ലെങ്കില്‍ ഏപ്രില്‍ 1 മുതല്‍ അത് പ്രവര്‍ത്തനരഹിതമാകുമെന്നും നമുക്കറിയാം.

ഇതുവരെ 61കോടി പാന്‍ കാര്‍ഡ് ഉപഭോക്താക്കളില്‍ 48കോടി മാത്രമേ ആധാറുമായി ലിങ്ക് ചെയ്തിട്ടുള്ളൂ എന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. 13 കോടി ആളുകള്‍ ഇനിയും പാന്‍ കാര്‍ഡ് ആധാറുമായി ലിങ്ക് ചെയ്തിട്ടില്ല. ഇവര്‍ക്കുള്ള അവസാന മുന്നറിയിപ്പും പുറത്തു വിട്ടിരിക്കുകയാണ് സര്‍ക്കാര്‍.

നിങ്ങളുടെ പാന്‍കാര്‍ഡ് ആധാറുമായി ലിങ്ക് ചെയ്തതാണോ അല്ലയോ എന്നറിയാന്‍ എന്തുചെയ്യും. അതിന് കഫേയിലേക്ക് ഓടുകയൊന്നും വേണ്ട ഇന്റെര്‍നെറ്റ് സംവിധാനം ഉണ്ടെങ്കില്‍ വീട്ടിലിരുന്ന് തന്നെ ഇത് അറിയാവുന്നതാണ്. ആദായനികുതി ഇ-ഫയലിങ് വെബ്‌സൈറ്റില്‍ http://www.incometax.gov.in ഇതിനുള്ള സംവിധാനമുണ്ട്. ലിങ്ക് ആധാര്‍ സ്റ്റാറ്റസ് ഓപ്ഷനായി ക്ലിക് ചെയ്ത് നിങ്ങള്‍ക്കത് പരിശോധിക്കാം.

നിങ്ങളുടെ പാന്‍ നമ്പറും ആധാര്‍ നമ്പറും നല്‍കുക, തുടര്‍ന്ന് ‘ലിങ്ക് ആധാര്‍ സ്റ്റാറ്റസ് കാണുക’ എന്നത് തിരഞ്ഞെടുക്കുക.
നിങ്ങളുടെ പാന്‍ ആധാറുമായി ലിങ്ക് ചെയ്തിട്ടുണ്ടെങ്കില്‍ ഒരു സന്ദേശം നിങ്ങളുടെ സ്‌ക്രീനില്‍ ദൃശ്യമാകും.

വീട്ടില്‍ ഇന്റര്‍നെറ്റ് കണക്ഷന്‍ ഇല്ലെങ്കില്‍ ഇന്റര്‍നെറ്റ് കഫേയിലോ അക്ഷയ കേന്ദ്രത്തിലോ ഒക്കെ ഇത് പരിശോധിക്കാവുന്നതാണ്.