2021 October 27 Wednesday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

ഗാന്ധിജി ഇന്ത്യയുടെ രാഷ്ട്ര പിതാവല്ല; വിഷം തുപ്പി സവര്‍ക്കറുടെ കൊച്ചു മകന്‍

  • ഇന്ത്യ പോലൊരു രാജ്യത്തിന് ഒരു രാഷ്ട്രപിതാവ് മാത്രമല്ല ഉണ്ടാകേണ്ടതെന്നും ഗാന്ധിജിയെ  ഇന്ത്യയുടെ രാഷ്ട്ര പിതാവായി കാണുന്നില്ലെന്നും രഞ്ജിത് സവര്‍ക്കര്‍

ന്യൂഡല്‍ഹി: ഗാന്ധിജി ഇന്ത്യയുടെ രാഷ്ട്രപിതാവല്ലെന്ന വിവാദ പരാമര്‍ശവുമായി സവര്‍ക്കറുടെ കൊച്ചുമകന്‍ രഞ്ജിത് സവര്‍ക്കര്‍.
ഇന്ത്യ പോലൊരു രാജ്യത്തിന് ഒരു രാഷ്ട്രപിതാവ് മാത്രമല്ല ഉണ്ടാകേണ്ടത്. ഗാന്ധിജിയെ താന്‍ ഇന്ത്യയുടെ രാഷ്ട്ര പിതാവായി കാണുന്നില്ല. ഇന്ത്യന്‍ സ്വാതന്ത്ര സമരത്തിന് ഒരുപാട് പിതാക്കളുണ്ടെന്നും രഞ്ജിത് സവര്‍ക്കര്‍ എ.എന്‍.ഐയോട് പറഞ്ഞു.
ഈ രാജ്യം രാജ്യമായതിന് അഞ്ഞൂറ് വര്‍ഷം പഴക്കമുണ്ട്. ഇന്ത്യ പോലൊരു രാജ്യത്ത് ഒരു രാഷ്ട്രപിതാവ് മാത്രമല്ല ഉണ്ടാകേണ്ടതെന്നും രഞ്ജിത് സവര്‍ക്കര്‍ കൂട്ടിച്ചേര്‍ത്തു.
സവര്‍ക്കര്‍ ജയിലില്‍ക്കിടന്ന് ബ്രിട്ടീഷുകാരോട് മാപ്പപേക്ഷിച്ചത് മഹാത്മാഗാന്ധിയുടെ നിര്‍ദേശപ്രകാരമായിരുന്നുവെന്ന പ്രതിരോധമന്ത്രി രാജ്നാഥ് സിങിന്റെ അവകാശവാദത്തിനു പിന്നാലെയാണ് സവര്‍ക്കറുടെ പിന്‍മുറക്കാരന്റെ ആക്ഷേപം.

രാജ്‌നാഥ് സിങ്ങിനു മറുപടിയുമായി പ്രതിപക്ഷ കക്ഷികള്‍ ഒന്നടങ്കം രംഗത്തെത്തിയിരുന്നു. എ.ഐ.എം.ഐ.എം നേതാവ് അസദുദ്ദീന്‍ ഉവൈസി സംഘ്പരിവാര്‍ വൈകാതെ ഇന്ത്യയുടെ രാഷ്ട്രപിതാവായി സവര്‍ക്കറെ വാഴ്ത്തുമെന്നും വിമര്‍ശിച്ചു.
സി.പി.എം ജനറല്‍ സെക്രട്ടറി സീതാറാം യെച്ചൂരിയും കോണ്‍ഗ്രസ് നേതാവ് ജയറാം രമേശും അദ്ദേഹത്തിനു മറുപടി നല്‍കിയിരുന്നു. സവര്‍ക്കര്‍ മാപ്പ് അപേക്ഷ നല്‍കിയത് 1911ലും 1913ലുമാണെന്നും എന്നാല്‍ ഗാന്ധി ഇന്ത്യന്‍ സ്വാതന്ത്ര്യ സമരത്തിന്റെ ഭാഗമായത് 1915 ലാണെന്നും ഇരുവരും ട്വീറ്റ് ചെയ്തു. 1920 ജനുവരി 25ന് മഹാത്മാ ഗാന്ധി എഴുതിയ കത്ത് കേന്ദ്രമന്ത്രി രാജ്‌നാഥ് സിങ് വളച്ചൊടിക്കുകയായിരുന്നുവെന്നും ജയറാം രമേശ് പറഞ്ഞു.

ഉദയ് മഹുര്‍ക്കര്‍ രചിച്ച വീര്‍ സവര്‍ക്കര്‍:ദി മാന്‍ ഹൂ കുഡ് ഹാവ് പ്രിവന്റഡ് പാര്‍ട്ടിഷന്‍ എന്ന പുസ്തകത്തിന്റെ പ്രകാശന ചടങ്ങിലായിരുന്നു രാജ്‌നാഥ് സിംഗിന്റെ പരാമര്‍ശം. രാജ്യത്തെ മോചിപ്പിക്കാന്‍ പ്രചാരണം നടത്തുന്നതുപോലെ സവര്‍ക്കറെ മോചിപ്പിക്കാനും തങ്ങള്‍ പ്രചാരണം നടത്തുമെന്ന് ഗാന്ധിജി പറഞ്ഞിരുന്നുവെന്നുകൂടി രാജ്‌നാഥ് ചടങ്ങില്‍ പറഞ്ഞു.

കമ്യൂണിസ്റ്റുകള്‍ പ്രചരിപ്പിക്കുന്നതുപോലെ സവര്‍ക്കര്‍ ഒരു ഫാസിസ്റ്റോ നാസിസ്റ്റോ ആയിരുന്നില്ല. നമ്മുടെ ദേശീയ നായകരെക്കുറിച്ച് അഭിപ്രായ വ്യത്യാസമുണ്ടാകാം. എന്നാല്‍ ഒരു പ്രത്യേക കാഴ്ചപ്പാടോടെ അവരെ കാണുന്നത് ശരിയല്ലെന്നും അദ്ദേഹം പറഞ്ഞു. ചില ആശയങ്ങളുടെ പേരിലാണ് ചിലര്‍ സവര്‍ക്കറെ എതിര്‍ക്കുന്നത്. ബ്രിട്ടീഷുകാരോട് വേണ്ടിവന്നാല്‍ സായുധ സമരം നടത്തണമെന്ന് സവര്‍ക്കര്‍ വിശ്വസിച്ചിരുന്നതായും കൂട്ടിച്ചേര്‍ക്കാനും രാജ്നാഥ് മറന്നില്ല.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

Advt.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.