2024 March 02 Saturday
രാജീവ് ഗാന്ധി വധക്കേസില്‍ ജയില്‍മോചിതനായ ശാന്തന്‍ മരിച്ചു

അഴിമതിക്കേസ്; സഊദിയിൽ അഞ്ചു മന്ത്രാലയങ്ങളിലെ ഉദ്യോഗസ്ഥരടക്കം 241 പേർ അറസ്‌റ്റിൽ

അബ്ദുസ്സലാം കൂടരഞ്ഞി

    റിയാദ്: സഊദിയിൽ അഴിമതിക്കേസിൽ മന്ത്രാലയ ഉദ്യോഗസ്ഥരടക്കം 241 പേർ അറസ്റ്റിലായി. വിവിധ മന്ത്രാലയങ്ങളിലെ ഉദ്യോഗസ്ഥരടക്കമുള്ളവരെയാണ് അഴിമതിയിൽ പങ്കുണ്ടെന്ന് ആരോപിക്കപ്പെട്ടതിനെ തുടർന്ന് അറസ്റ്റ് ചെയ്തതെന്നു അഴിമതി വിരുദ്ധ സമിതി (നസാഹ) അറിയിച്ചു. അഴിമതിക്കേസിൽ പിടിയിലായവരിൽ സ്വദേശികളെ കൂടാതെ ഏതാനും വിദേശികളും ഉൾപ്പെടും. ആഭ്യന്തര മന്ത്രാലയം, ആരോഗ്യ മന്ത്രാലയം, മുനിസിപ്പൽ, ഗ്രാമീണ, ഭവന കാര്യ മന്ത്രാലയം, വിദ്യാഭ്യാസ മന്ത്രാലയം, മാനവ വിഭവശേഷി, സാമൂഹിക വികസനമന്ത്രാലയം തുടങ്ങി അഞ്ചു മന്ത്രാലയങ്ങളും സഊദി കസ്‌റ്റംസ്‌, സഊദി പോസ്റ്റ് തുടങ്ങി ഗവണ്മെന്റിന്റെ കീഴിലുള്ള സമിതികളിലെയും ഉദ്യോഗസ്ഥരാണ് പിടിയിലായതെന്ന് നസാഹ അറിയിച്ചു.

    കൈക്കൂലി, അധികാര ദുർവിനിയോഗം, വ്യാജരേഖ ചമയ്ക്കൽ എന്നിവയാണ് ഇവർക്കെതിരെ ചുമത്തിയ കുറ്റങ്ങൾ. കഴിഞ്ഞ മാസം അഴിമതി വിരുദ്ധ സമിതി (നസാഹ) നടത്തിയ 263 പരിശോധനാ റെയ്ഡുകളിലാണ് ഇവരെ അറസ്റ്റ് ചെയ്തത്. 757 പേരുടെ പങ്കിനെക്കുറിച്ച് അന്വേഷണം നടത്തിയ ശേഷമാണ് പ്രതികളെ അറസ്റ്റ് ചെയ്തത്. കോടതികളിൽ ഇവരെ കൈമാറും മുമ്പ് ചെയ്യുന്നതിന് മുമ്പ് നിയമ നടപടിക്രമങ്ങൾ പൂർത്തിയാക്കുകയാണെന്ന് നസാഹ പറഞ്ഞു.

    സാമ്പത്തികമോ ഭരണപരമോ കാര്യങ്ങളിൽ എന്തെങ്കിലും സംശയാസ്പദമായ പ്രവർത്തനങ്ങൾ ശ്രദ്ധയിൽപ്പെട്ടാൽ റിപ്പോർട്ട് ചെയ്യാൻ കമ്മീഷൻ എല്ലാവരോടും ആവശ്യപ്പെട്ടു. ടോൾ ഫ്രീ നമ്പർ 980 നമ്പറിലോ www.nazaha.gov.sa വെബ്‌സൈറ്റ് മുഖേനയോ 980 @ nazaha.gov.sa ഇമെയിൽ വഴിയോ 0114420057 നമ്പറിലെ ഫാക്‌സ് വഴിയോ ആണ് വിവരങ്ങൾ കൈമാറേണ്ടത്.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Comments are closed for this post.