ദുബൈ സഫാരി പാർക്ക് വീണ്ടും തുറക്കുന്ന തിയ്യതി പ്രഖ്യാപിച്ചു; പ്രത്യേക പാക്കേജ് അറിയാം

ദുബൈ: ദുബൈയുടെ വന്യജീവി സങ്കേതമായ ദുബൈ സഫാരി പാർക്ക് ഒക്ടോബർ 5-ന് വീണ്ടും തുറക്കും. വേനൽക്കാലത്ത് അടച്ചിട്ട പാർക്ക് ആണ് പുതിയ സീസൺ ആരംഭിക്കുന്നതോടെ വീണ്ടും തുറക്കുന്നത്. പാർക്കിലേക്ക് സന്ദർശകർക്ക് പ്രവേശിക്കാനുള്ള ബുക്കിംഗ് ഇപ്പോൾ അതിന്റെ വെബ്‌സൈറ്റിൽ ഓപ്പൺ ആയിട്ടുണ്ട്.

ഈ സീസണിലെ ഹൈലൈറ്റുകളിൽ പ്രധാനം ‘പക്ഷി സാമ്രാജ്യം’ (Bird Kingdom) ഷോയാണ്. ലോകത്തിലെ ഏറ്റവും ആകർഷകമായ ചില ജീവികളെ സന്ദർശകർക്ക് ഈ സാമ്രാജ്യത്തിൽ കാണാം. 119 ഹെക്ടർ വിസ്തൃതിയുള്ള പാർക്കിൽ 3,000 മൃഗങ്ങളുണ്ട്. 10 മാംസഭുക്കുകളും 17 പ്രൈമേറ്റുകളും ഉൾപ്പെടെ 78 ഇനം സസ്തനികൾ, 50 തരം ഉരഗങ്ങൾ, 111 തരം പക്ഷികൾ, ഉഭയജീവികൾ തുടങ്ങി വിവിധ ജീവികൾ ഇവിടെ കാണാം. സന്ദർശകർക്ക് മൃഗങ്ങളെയും പക്ഷികളെയും അവയുടെ സ്വാഭാവിക ആവാസവ്യവസ്ഥയിൽ കാണാമെന്നതാണ് സഫാരി പാർക്കിന്റെ പ്രത്യേകത.

ദുബൈ മുനിസിപ്പാലിറ്റിയുടെ മേൽനോട്ടത്തിലുള്ള പാർക്കിൽ കഴിഞ്ഞ സീസണിൽ കഴിഞ്ഞ വർഷം അഞ്ച് ലക്ഷത്തിലധികം സന്ദർശകരാണ് എത്തിയത്. അഞ്ച് വിഭാഗങ്ങളായാണ് പാർക്കിനെ തരം തിരിച്ചിരിക്കുന്നത്. ആഫ്രിക്കൻ വില്ലേജ്, ഏഷ്യൻ വില്ലേജ്, അറേബ്യൻ ഡെസേർട്ട് സഫാരി, എക്സ്പ്ലോറർ വില്ലേജ്, താഴ്വാരം എന്നിവയാണ് അവ.

50 ദിർഹം മുതൽ 110 ദിർഹം വരെയാണ് ടിക്കറ്റ് നിരക്ക്. ഡേ പാസും സഫാരി യാത്രയും ഉൾപ്പെടെയുള്ള വിവിധ പാക്കേജുകൾ ഉണ്ട്.

പ്രത്യേക പാക്കേജുകളിൽ ഇവ ഉൾപ്പെടുന്നു:

• കിംഗ് ഓഫ് സഫാരി: പാർക്കിലെ വൈവിധ്യമാർന്ന മൃഗങ്ങളെക്കുറിച്ചുള്ള വിവരങ്ങൾ പങ്കിടുന്ന ഒരു വിദഗ്ധ ഗൈഡിന്റെ നേതൃത്വത്തിലാണ് ഈ യാത്ര.

• ബിഹൈൻഡ് ദി സീൻ – 90 മിനിറ്റ് യാത്രയിൽ മൃഗങ്ങൾക്ക് നൽകുന്ന ദൈനംദിന പരിചരണ സേവനങ്ങളെക്കുറിച്ച് ഉള്ള വിവരങ്ങൾ അറിയാം

• ജംഗിൾ ക്യാപ്‌ചർ: പാർക്കിനുള്ളിലെ തനതായ സ്ഥലങ്ങളിൽ നിന്ന് മൃഗങ്ങളുടെ ഫോട്ടോകൾ എടുക്കാൻ സന്ദർശകർക്ക് ഇത് മൂന്ന് എക്‌സ്‌ക്ലൂസീവ് മണിക്കൂർ നൽകും.

• കാട്ടിൽ ഭക്ഷണം കഴിക്കുക: പാർക്കിന്റെ ഹൃദയഭാഗത്ത് സന്ദർശകർക്ക് അവരുടെ പ്രിയപ്പെട്ട ഭക്ഷണം ആസ്വദിക്കാനുള്ള അവസരം ഇത് നൽകുന്നു.

• ജിറാഫുകൾക്കും കാണ്ടാമൃഗങ്ങൾക്കും ഭക്ഷണം നൽകുന്നതിന് സന്ദർശകർക്ക് പ്രത്യേക സെഷനുകളും തിരഞ്ഞെടുക്കാം