തിരുവനന്തപുരം: ഓടുന്ന ചരക്കുലോറിയുടെ സ്റ്റിയറിങില്‍ തോര്‍ത്തുമുണ്ട് കെട്ടിവെച്ച ശേഷം കൂളായി പിന്നിലെ സീറ്റില്‍ കിടന്നുചിരിക്കുന്ന ഡ്രൈവര്‍. സമൂഹമാധ്യമങ്ങളില്‍ വൈറലായ വീഡിയോയിലെ രംഗങ്ങളാണിത്.

വാഹനം ഓടിക്കുമ്പോള്‍ തന്നെ എങ്ങനെ ഉറങ്ങാമെന്ന് ഡ്രൈവര്‍ പറഞ്ഞുകൊടുക്കുന്ന ഈ വീഡിയോയില്‍, ‘എന്റെ ജീവന്‍ വെച്ചാണ് നിങ്ങള്‍ കളിക്കുന്നതെന്ന് വീഡിയോ എടുക്കുന്നയാള്‍ പറയുന്നതും കേള്‍ക്കാം.

വെള്ളത്തിന്റെ ബോട്ടില്‍ ആക്‌സിലേറ്ററില്‍ ജാമാക്കി വെക്കണമെന്നും തുടര്‍ന്ന് മുണ്ടെടുത്ത് സ്റ്റിയറിങില്‍ കെട്ടുന്നതുമാണ് വീഡിയോയിലുള്ളത്.

ഇത്തരത്തില്‍ റോഡിലൂടെ അപകടകരമായി വാഹനമോടിച്ച ഇയാള്‍ക്കെതിരെ നടപടി എടുക്കണമെന്നാവശ്യപ്പെട്ട് നിരവധി ആളുകളാണ് ഈ വീഡിയോ പങ്കുവെച്ചിട്ടുള്ളത്. എന്നാല്‍ ഈ വീഡിയോയുടെ വാസ്തവം എന്താണെന്ന് പുറത്തുവിട്ടിരിക്കുകയാണ് കേരള പൊലിസ്. റോറോ സര്‍വീസിന്റെ ഭാഗമായി ട്രെയിനില്‍ കയറ്റിയ ലോറിയില്‍ നിന്നുള്ളതാണ് ഈ ദൃശ്യമെന്നാണ് പൊലിസ് പറയുന്നത്.

സോഷ്യല്‍ മീഡിയയില്‍ കാണുന്നതെന്തും കണ്ണുമടച്ചു വിശ്വസിക്കരുതേ എന്ന മേല്‍കുറിപ്പോടെ വീഡിയോ സഹിതമാണ് പൊലിസ് അവരുടെ ഫെയ്‌സ്ബുക്ക് പേജില്‍ പോസ്റ്റ് ചെയ്തിരിക്കുന്നത്.