2021 March 07 Sunday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

‘അധികാരമേല്‍ക്കുന്നവര്‍ ചൈനയെ പ്രത്യേകം നിരീക്ഷിക്കണം’: വൈറ്റ് ഹൗസ് വിടുന്നതിനു മുന്‍പ് ട്രംപിന്റെ വീഡിയോ

 

വാഷിങ്ടന്‍ ഡി.സി: ഒരു രാജ്യത്തിനെതിരെയും യുദ്ധം പ്രഖ്യാപിക്കാതെ നാലു വര്‍ഷത്തെ ഭരണം അവസാനിക്കുന്നുവെന്നും, അടുത്ത അധികാരം ഏറ്റെടുക്കുന്നവര്‍ ചൈനയെ പ്രത്യേകം നിരീക്ഷിക്കണമെന്നും താന്‍ ചൈനയ്‌ക്കെതിരെ സ്വീകരിച്ച നയങ്ങള്‍ തുടരണമെന്നും അധികാരമൊഴിയുന്നതിന് മുന്‍പ് ഇരുപതുമിനിട്ട് നീണ്ടുനിന്ന വിഡിയോ സന്ദേശത്തില്‍ ട്രംപ് പറഞ്ഞു. ബൈഡന്‍- കമല ഹാരിസിനെ പേരെടുത്ത് പറഞ്ഞ് അഭിനന്ദിക്കാതെ പുതിയ ഭരണ കൂടത്തിന് എല്ലാ ആശംസകളും നേരുന്നതായും ട്രംപ് സന്ദേശത്തില്‍ വ്യക്തമാക്കി.

അധികാരം ഒഴിയുന്നതിനു തൊട്ടുമുന്‍പുള്ള ഇരുപത്തിനാലു മണിക്കൂറും വൈറ്റ് ഹൗസില്‍ തിരക്കിട്ട പരിപാടികളിലായിരുന്നു ട്രംപ്. അമേരിക്കയെ സുരക്ഷിതമായ രാഷ്ട്രമായി നിലനിര്‍ത്തുന്നതിന് പുതിയ ഭരണകൂടത്തിന് കഴിയട്ടെ എന്ന് പ്രാര്‍ഥിക്കുന്നതായും ട്രംപ് പറഞ്ഞു.

ജനുവരി ആറിനുണ്ടായ അക്രമ പ്രവര്‍ത്തനങ്ങളെ ശക്തമായി അപലപിക്കുന്നുവെന്നും ഇത്തരം പ്രവര്‍ത്തനങ്ങള്‍ ജനങ്ങളെ കൂടുതല്‍ ഭയചകിതരാക്കുമെന്നും ഇത് അംഗീകരിക്കാനാവില്ലെന്നും അദ്ദേഹം കൂട്ടിച്ചേര്‍ത്തു. തന്റെ ഭരണകാലത്തെ നേട്ടങ്ങളെ ചൂണ്ടികാണിക്കുന്നതിനും ട്രംപ് സമയം കണ്ടെത്തി.

അമേരിക്കയുടെ കുതിച്ചുയര്‍ന്ന സാമ്പത്തിക നേട്ടങ്ങള്‍ക്കു മങ്ങല്‍ ഏല്‍പ്പിക്കുവാന്‍ ചൈനീസ് വൈറസിന് കഴിഞ്ഞു. എന്നാല്‍ ഇതിനെ അതിജീവിക്കുവാന്‍ പുതിയ ഭരണകൂടത്തിന് കഴിയട്ടെ എന്ന് ട്രംപ് ആശംസിച്ചു. തന്റെ ഭരണത്തില്‍ സുപ്രധാന പങ്കുവഹിച്ച വൈസ് പ്രസിഡന്റ്, കാബിനറ്റ് അംഗങ്ങള്‍, സ്റ്റാഫ് എന്നിവര്‍ക്കും ട്രംപ് നന്ദി രേഖപ്പെടുത്തി.

Advt.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.