തൃശൂര്‍: ഈയിലെ ലൈഫ് മിഷന്‍ കേസില്‍ മുഖ്യമന്ത്രി പിണറായി വിജയനെതിരേ ഗുരുതരമായ ആരോപണം ഉന്നയിച്ച മുന്‍ എം.എല്‍.എ അനില്‍ അക്കര സി.ബി.ഐക്ക് നിര്‍ണായകവിവരങ്ങള്‍ കൈമാറി. വടക്കാഞ്ചേരി ലൈഫ് മിഷന്‍ ഫഌറ്റുമായി ബന്ധപ്പെട്ട രേഖകളാണ് കൈമാറിയത്. ലൈഫ് മിഷന്‍ കേസില്‍ മുഖ്യമന്ത്രിയെ പ്രതിരോധത്തിലാക്കുന്ന തെളിവുകള്‍ തന്റെ പക്കലുണ്ടെന്ന് നേരത്തെ അനില്‍ അക്കര വാര്‍ത്താസമ്മേളനം നടത്തി ആരോപിച്ചിരുന്നു. പല രേഖകളും പുറത്തുവിടുകയും ചെയ്തു. ഇതുസംബന്ധിച്ച രേഖകളടക്കമാണ് അനില്‍ കൈമാറിയത്.

ഇതേ തുടര്‍ന്നാണ് സി.ബി.ഐ സംഘം അനില്‍ അക്കരയെ ബന്ധപ്പെട്ടത്. ഇതിന് പിന്നാലെയാണ് അന്വേഷണ സംഘത്തിന് അദ്ദേഹം നിര്‍ണ്ണായകമായ വിവരങ്ങള്‍ നല്‍കുകയായിരുന്നു. മുഖ്യമന്ത്രി വിദേശ സംഭാവന നിയന്ത്രണ ചട്ടം ലംഘിച്ചു. മുഖ്യമന്ത്രി അധ്യക്ഷനായ യോഗം ചേര്‍ന്നതിന്റെ റിപ്പോര്‍ട്ട് അദ്ദേഹം പുറത്തുവിട്ടിരുന്നു.

ലൈഫ്മിഷന്‍ സി.ഇ.ഒ. യു.വി.ജോസ്, മുന്‍ മന്ത്രി എ.സി. മൊയ്തീന്റെ പ്രൈവറ്റ് സെക്രട്ടറിയ്ക്ക് നല്‍കിയ കത്തും പുറത്തുവിട്ടവയില്‍ പെടുന്നു. മാത്രമല്ല ലൈഫ് മിഷനില്‍ എടുത്ത തിരുമാനം മുഖ്യമന്ത്രിയുടെ അധ്യക്ഷതയില്‍ ചേര്‍ന്ന യോഗത്തിന്റേതായിരുന്നുവെന്നും അനില്‍ അക്കര വെളിപ്പെടുത്തിയിരുന്നു. ഈ രേഖകളൊക്കെ സി.ബി ഐ.ക്ക് കൈമാറിയിട്ടുണ്ട്.