കൊല്‍ക്കത്ത: ഇന്ത്യന്‍ സൂപ്പര്‍ ലീഗില്‍ മോഹന്‍ ബഗാനെതിരായ മത്സരത്തില്‍ കേരള ബ്ലാസ്‌റ്റേഴ്‌സിന് തോൽവി. 3-2 നാണ് ബ്ലാസ്റ്റേഴ്സ് പരാജയം ഏറ്റുവാങ്ങിയത്. മത്സരത്തിന്റെ 85ാം മിനിറ്റ് വരെ 2-1ന് മുന്നിലായിരുന്ന ബ്ലാസ്റ്റേഴ്‌സിനെതിരെ അവസാന മിനിറ്റുകളില്‍ നേടിയ ഇരട്ട ഗോളാണ് ബ​ഗാന് വിജയം നേടിക്കൊടുത്തത്. ബ്ലാസ്റ്റേഴ്‌സിനായി ഹിമെനെ ഹെസൂസ് (51ാം മിനിറ്റ്), മിലോസ് ഡ്രിന്‍സിച്ച് (77) എന്നിവര്‍ ഗോള്‍ നേടിയപ്പോള്‍, മോഹന്‍ ബഗാനായി ജാമി മക്ലാരന്‍ (33ാം മിനിറ്റ്), ജെയ്‌സന്‍ കമ്മിന്‍സ് (85), ആല്‍ബര്‍ട്ടോ (90+4) എന്നിവര്‍ ഗോള്‍ മടക്കി.

മത്സരത്തിന്റെ 33ാം മിനിറ്റില്‍ ബ്ലാസ്റ്റേഴ്‌സ് ഗോള്‍കീപ്പര്‍ സച്ചിന്‍ സുരേഷിന്റെ പിഴവ് മുതലെടുത്ത് മോഹന്‍ ബഗാന്‍ മുന്നിലെത്തി. ജാമി മക്ലാരനാണ് മോഹന്‍ ബഗാനായി ഗോള്‍ നേടിയത്. രണ്ടാം പകുതിയില്‍ ബ്ലാസ്റ്റേഴ്സ് മത്സരത്തിലേക്ക് തിരിച്ചെത്തി. ബഗാന്റെ പ്രതിരോധത്തിലുണ്ടായ പിഴവ് മുതലെടുത്ത് ജിമിനെസ് 51ാം മിനിറ്റില്‍ സമനില ഗോള്‍ നേടി.

77-ാം മിറ്റില്‍ മിലോസ് ഡ്രിന്‍സിച്ചിലൂടെ ബ്ലാസ്റ്റേഴ്സ് ലീഡെടുത്തു. ആറ് മിനിറ്റിന് ശേഷം ബ​ഗാനായി കമ്മിന്‍സിന്റെ സമനില ഗോളെത്തി. 2-2ന് മത്സരം അവസാനിച്ചെന്നിരിക്കെയാണ് ആല്‍ബര്‍ട്ടോയുടെ ബോക്സിന് പുറത്തുനിന്നുള്ള ബുള്ളറ്റ് ഷോട്ട് ബ്ലാസ്റ്റേഴ്സിന്റെ വലകുലുക്കിയത് സ്‌കോര്‍ 3-2.

ഐഎസ്എല്ലിൽ അവസാനം കളിച്ച അഞ്ച് മത്സരത്തില്‍ ഒന്നില്‍മാത്രമാണ് ബ്ലാസ്റ്റേഴ്സിന് വിജയിക്കാനായത്. സീസണിലെ ഏഴാം തോല്‍വി വഴങ്ങിയ ബ്ലാസ്റ്റേഴ്‌സ് മൂന്നു ജയവും രണ്ടു സമനിലയുമായി 11 പോയിന്റോടെ 10ാം സ്ഥാനത്താണ്. 10 കളിയില്‍നിന്ന് 23 പോയിന്റുള്ള ബഗാനാണ് ലീഗില്‍ ഒന്നാം സ്ഥാനത്ത്.

Blasters lost to Bagan too