വൈക്കം: തമിഴ്നാട് പൊതുമരാമത്ത് വകുപ്പ് നവീകരിച്ച തന്തൈ പെരിയാര്‍ സ്മാരകവും ഗ്രന്ഥശാലയും ഉദ്ഘാടനം ചെയ്യുന്നതിനായി തമിഴ്‌നാട് മുഖ്യമന്ത്രി എം.കെ സ്റ്റാലിന്‍ കേരളത്തിലെത്തി. മുഖ്യമന്ത്രി പിണറായി വിജയനുമായി ഇന്ന് രാത്രി സ്റ്റാലിന്‍ കൂടിക്കാഴ്ച്ച നടത്തും. കോട്ടയം കുമരകം ലേക് റിസോര്‍ട്ടില്‍ വച്ചാണ് കൂടിക്കാഴ്ച്ച. 

നാളെ രാവിലെ 10മണിക്കാണ് തന്തൈ പെരിയാര്‍ സ്മാരകവും ഗ്രന്ഥശാലയും ഉദ്ഘാടനം ചെയ്യപ്പെടുക. മുഖ്യമന്ത്രി പിണറായി വിജയന്‍ അധ്യക്ഷത വഹിക്കും.

തന്തൈ പെരിയാര്‍ വൈക്കം സത്യഗ്രഹത്തില്‍ പങ്കെടുത്തതിന്റെ ശതാബ്ദി ആഘോഷ സമാപനത്തിന്റെ ഭാഗമായി എം.കെ സ്റ്റാലിന്‍ പെരിയാര്‍ സ്മാരകത്തേയും ഗ്രന്ഥശാലയേയും നവീകരിക്കാന്‍ 8.14 കോടി രൂപ അനുവദിച്ചിരുന്നു. അതുപയോഗിച്ച് തമിഴ്നാട് പൊതുമരാമത്ത് വകുപ്പാണ് ഇവിടെ നവീകരിച്ചത്.

ചടങ്ങില്‍ ദ്രാവിഡ കഴകം അധ്യക്ഷനും തന്തൈ പെരിയാറിന്റെ ശിഷ്യനുമായ കെ.വീരമണി മുഖ്യാതിഥിയായിരിക്കും. തമിഴ്നാട് ജലസേചന മന്ത്രി ദുരൈ മുരുകന്‍, പൊതുമരാമത്ത് മന്ത്രി എ.വി വേലു, ഇന്‍ഫര്‍മേഷന്‍ മന്ത്രി എം.പി സാമനാഥന്‍ ഉള്‍പ്പടെ തമിഴ്‌നാട്ടിലെയും കേരളത്തിലെയും മന്ത്രിമാരും ഉന്നത ഉദ്യോഗസ്ഥരും പങ്കെടുക്കും.