അബൂദബി: ലോകത്തിലെ ഏറ്റവും മനോഹരമായ വിമാനത്താവളമെന്ന നേട്ടം സ്വന്തമാക്കി സായിദ് അന്താരാഷ്ട്ര വിമാനത്താവളം. കായികവേദികൾ, ഹോട്ടലുകൾ, വിമാനത്താവളങ്ങൾ, മ്യൂസിയങ്ങൾ തുടങ്ങിയവയുടെ മികച്ച രൂപകൽപനകൾക്ക് അംഗീകാരം നൽകുന്നതിനായി യുനസ്കോ ആരംഭിച്ച പ്രി വെർസൈയ്ൽസ് പുരസ്‌കാരമാണ് സായിദ് അന്താരാഷ്ട്ര വിമാനത്താവളം കരസ്ഥമാക്കിയത്. 

പാരിസിലെ യുനസ്കോ ആസ്ഥാനത്ത് നടന്ന ചടങ്ങിലായിരുന്നു പുരസ്‌കാര പ്രഖ്യാപനം. യു.എ.ഇയുടെ 53-ാമത് ദേശീയദിനാഘോഷ വേളയിലാണ് പുരസ്‌കാരമെന്നത് ഇരട്ടിമധുരമായി. യു.എ.ഇയുടെ സംസ്കാരിക പൈതൃകത്തെ ഉൾക്കൊള്ളുന്നതിനൊപ്പം നവീന സാങ്കേതികവിദ്യകൾ കൂടി സമന്വയിപ്പിച്ചാണ് വിമാനത്താവളത്തിൻ്റെ രൂപകൽപനയും നിർമാണവും നടത്തിയത്. 7,42,000 ചതുരശ്ര മീറ്ററിൽ നിർമ്മിച്ചിരിക്കുന്ന വിമാനത്താവളത്തിന് മണിക്കൂറിൽ 11,000 യാത്രികരെയും ഒരേസമയം 79 വിമാനങ്ങളെയും ഉൾക്കൊള്ളാൻ സാധിക്കും.

2025ൽ ലോകത്തിലാദ്യമായി ഒമ്പത് ബയോമെട്രിക് ടച്ച് പോയൻ്റുകൾ വിമാനത്താവളത്തിൽ ആരംഭിക്കുന്നതോടെ ഒരുവർഷം ഈ വിമാനത്താവളം വഴി 4.5 കോടി യാത്രികർക്ക്  സഞ്ചരിക്കാനാവും. ഇത് അബൂദബി എയർപോർട്ട്സിനെ സംബന്ധിച്ച് അഭിമാന നിമിഷമാണെന്ന് പുരസ്‌കാരനേട്ടത്തിൽ അബൂദബി എയർപോർട്‌സ് മാനേജിങ് ഡയറക്‌ടറും ചീഫ് എക്‌സിക്യൂട്ടിവ് ഓഫിസറുമായ എലിന സോർലിനി പറ‍ഞ്ഞു. Zayed International Airport is the most beautiful airport in the world