കോഴിക്കോട്: എലത്തൂര്‍ HPCL ലെ ഇന്ധനം ചോര്‍ന്ന സംഭവത്തില്‍ കമ്പനിക്ക് ഗുരുതര വീഴ്ചയുണ്ടായെന്ന് കലക്ടര്‍ സ്‌നേഹില്‍ കുമാര്‍ സിങ്. ഫാക്ടറീസ് ആക്ട് പ്രകാരം കേസെടുത്തെന്നും കലക്ടര്‍ കൂട്ടിച്ചേര്‍ത്തു. 

'വലിയ ദുരന്തത്തിലേക്ക് പോകാന്‍ സാധ്യതയുണ്ടായിരുന്നു, അതുണ്ടാകാതിരുന്നത് ഭാഗ്യമാണ്. സര്‍ക്കാറിന് റിപ്പോര്‍ട്ട് നല്‍കും, സര്‍ക്കാറാണ് നടപടിയെടുക്കേണ്ടത്. തകരാര്‍ പെട്ടെന്ന് കണ്ടെത്താന്‍ HPCL ന് കഴിഞ്ഞില്ല. HPCL ന് ഉത്തരവാദിത്തമുണ്ട്, 1500 ലിറ്റര്‍ ഡീസലാണ് ചോര്‍ന്നത്, ഇത്രയും ചോര്‍ന്നതിന് ശേഷമാണ് മനസ്സിലായത്.' കലക്ടര്‍ കൂട്ടിച്ചേര്‍ത്തു.

ഓവര്‍ഫ്‌ലോ ഉണ്ടായെന്നും അലാം സംവിധാനം കൃത്യമായി പ്രവര്‍ത്തിച്ചില്ലെന്നും എച്ച്പിസിഎല്‍ അധികൃതര്‍ സമ്മതിച്ചു. സംഭവത്തില്‍ ജില്ലാ കലക്ടറുടെ നേതൃത്വത്തില്‍ യോഗം ചേര്‍ന്നു. ജനപ്രതിനിധികള്‍, വിവിധ വകുപ്പ് മേധാവികള്‍, എച്ച്പിസിഎല്‍ അധികൃതര്‍ എന്നിവര്‍ യോഗത്തിനെത്തി. 

അതേസമയം നാലാം തവണയാണ് പ്ലാന്റില്‍ നിന്ന് ഇന്ധനം ചോരുന്നതെന്ന് നാട്ടുകാര്‍ പറഞ്ഞു. എന്നാല്‍ ആവശ്യമായ മുന്‍കരുതല്‍ സ്വീകരിക്കാന്‍ അധികൃതര്‍ തയാറായില്ല. ഇത്രയും വലിയ ചോര്‍ച്ചയുണ്ടാകുന്നത് ആദ്യമാണെന്നും നാട്ടുകാര്‍ പറഞ്ഞു.