കസാന്‍(റഷ്യ): പശ്ചിമേഷ്യയിലെ തുടരെയുള്ള യുദ്ധങ്ങള്‍ മേഖലയെ പൂര്‍ണമായ യുദ്ധത്തിലേക്ക് തള്ളിവിടുമെന്ന് റഷ്യന്‍ പ്രസിഡന്റ് വ്‌ളാദിമിര്‍ പുടിന്‍. ഫലസ്തീനികള്‍ക്ക് സ്വതന്ത്രമായ ഒരു രാജ്യം ലഭിക്കുന്നതുവരെ മേഖലയില്‍ സമാധാനം പുലരുകയില്ലെന്നും ബ്രിക്‌സ് ഉച്ചകോടിയില്‍ അദ്ദേഹം പറഞ്ഞു.

ഒരു വര്‍ഷം മുമ്പ് തുടങ്ങിയ ഇസ്‌റാഈലിന്റെ ഗസ്സ ആക്രമണം ഇപ്പോള്‍ ലബനാനിലേക്കും കടന്നിരിക്കുകയാണ്. ഇത് മറ്റു രാജ്യങ്ങളെയും ബാധിച്ചുതുടങ്ങിയിട്ടുണ്ട്. ഇറാനുമായുള്ള ഇസ്‌റാഈലിന്റെ സംഘര്‍ഷവും വലുതായിരിക്കുന്നു. ഇത് വലിയ യുദ്ധത്തിനിടയാക്കുമെന്നും പുടിന്‍ ചൂണ്ടിക്കാട്ടി.
യു.എന്‍ അംഗീകരിച്ച ദ്വിരാഷ്ട്ര പരിഹാരം നടപ്പിലായെങ്കിലേ മേഖലയില്‍ സമാധാനവും സ്ഥിരതയും കൈവരൂ. ഫലസ്തീനികളോട് ചരിത്രപരമായി തുടര്‍ന്നുവരുന്ന അനീതി ഇല്ലാതാക്കാന്‍ ഇത് സഹായിക്കുമെന്നും അദ്ദേഹം അഭിപ്രായപ്പെട്ടു.