തിരുവനന്തപുരം: ജീവന് ഭീഷണിയുണ്ടെന്ന സ്വര്‍ണക്കടത്ത് കേസ് പ്രതി സ്വപ്‌നയുടെ വെളിപ്പെടുത്തല്‍ അന്വേഷിക്കുമെന്ന് ജയില്‍ ഡി.ജി.പി ഋഷിരാജ് സിംഗ്. ദക്ഷിണ മേഖല ജയില്‍ ഡി.ഐ.ജിക്കാണ് അന്വേഷണച്ചുമതല. അന്വേഷണം നടത്തി സര്‍ക്കാരിന് റിപ്പോര്‍ട്ട് നല്‍കുമെന്നും ഋഷിരാജ് സിംഗ് പറഞ്ഞു.

ജീവന് ഭീഷണിയുണ്ടെന്ന് ചൂണ്ടിക്കാട്ടി സ്വപ്ന എറണാകുളം അഡിഷനല്‍ ചീഫ് ജുഡിഷ്യല്‍ മജിസ്ട്രേറ്റ് (സാമ്പത്തികം) കോടതിയില്‍ അപേക്ഷ നല്‍കിയതിനെത്തുടര്‍ന്ന് സ്വപ്ന സുരേഷിന് ജയിലില്‍ സുരക്ഷയൊരുക്കാന്‍ കോടതി നിര്‍ദേശം നല്‍കിയിരുന്നു.

നവംബര്‍ 25 വരെ ജുഡിഷ്യല്‍ കസ്റ്റഡിയില്‍ അട്ടകുളങ്ങര വനിതാ ജയിലില്‍ കഴിഞ്ഞിരുന്ന തന്നെ ജയില്‍ ഉദ്യോഗസ്ഥരോ പൊലിസുകാരോ എന്ന് സംശയിക്കുന്ന ചിലര്‍ വന്നു കണ്ടുവെന്നും കേസില്‍ ഉള്‍പ്പെട്ടതായി സംശയിക്കുന്ന ഉന്നതരുടെ പേരുവിവരങ്ങള്‍ വെളിപ്പെടുത്തരുതെന്നും കേന്ദ്ര ഏജന്‍സികള്‍ നടത്തുന്ന അന്വേഷണവുമായി സഹകരിക്കരുതെന്നും അവര്‍ ആവശ്യപ്പെട്ടുവെന്നും സ്വപ്ന അപേക്ഷയില്‍ പറയുന്നു. എന്തെങ്കിലുംതരത്തിലുള്ള വിവരങ്ങള്‍ പുറത്തുവിട്ടാല്‍ തന്റെ കുടുംബത്തെയും തന്നെയും ഇല്ലാതാക്കാന്‍ കഴിവുള്ളവരാണെന്ന് ജയിലില്‍ വന്നുകണ്ടവര്‍ ഭീഷണിപ്പെടുത്തിയെന്നും സ്വപ്ന അപേക്ഷയില്‍ പറഞ്ഞിരുന്നു.