കോട്ടയം: 2017ല്‍ കാണാതായ ദമ്പതികളെ കുറിച്ച് ഇപ്പോഴും ഇരുട്ടില്‍ തപ്പി പൊലിസ്. കോട്ടയം താഴത്തങ്ങാടിയില്‍ നിന്നാണ് അറുപറ ഒറ്റക്കണ്ടത്തില്‍ ഹാഷിം, ഹബീബ ദമ്പതികളെ കാണാതായത്. ഇവര്‍ക്കായി മറിയപ്പള്ളിയിലെ പാറക്കുളത്തില്‍ ക്രൈംബ്രാഞ്ച് ഇന്ന് തിരച്ചില്‍ നടത്തി. ഇവരുടേത് ആത്മഹത്യയാകാമെന്ന നിഗമനത്തിലാണ് പാറക്കുളത്തില്‍ ക്രൈംബ്രാഞ്ച് സംഘം തിരച്ചില്‍ ആരംഭിച്ചത്.
2017 മെയ് മാസത്തിലെ ഹര്‍ത്താല്‍ ദിനത്തിലാണ് ഇവരെ കാണാതായത്. ഇരുവരെയും കണ്ടെത്തുന്നതിനായി പൊലിസ് സംഘം തിരച്ചില്‍ നടത്തിയിരുന്നു. പിന്നീട് അന്വേഷണം ക്രൈംബ്രാഞ്ചിന് കൈമാറുകയായിരുന്നു. പീരുമേട്, വാഗമണ്‍ ഉള്‍പ്പടെയുള്ള സ്ഥലങ്ങളില്‍ പൊലിസ് പരിശോധന നടത്തിയെങ്കിലും വിവരമൊന്നും ലഭിച്ചില്ല.

കാണാതാകുന്നതിന് തലേദിവസം ഹാഷിം പീരുമേട്ടില്‍ പോയിരുന്നുവെന്ന് പൊലിസ് കണ്ടെത്തിയിരുന്നു. മൊബൈല്‍ സിഗ്‌നലുകളില്‍ നിന്നാണ് ഇക്കാര്യം വ്യക്തമായത്. ഇതിന്റെ അടിസ്ഥാനത്തിലാണ് ഇവിടങ്ങളില്‍ പരിശോധന നടത്തിയത്.