കുവൈത്തില്‍ വിദേശികളുടെ ഡ്രൈവിങ് ലൈസന്‍സ് പുതുക്കുന്ന കാലാവധിയില്‍ മാറ്റം

കുവൈത്ത്: കുവൈത്തില്‍ ഇനിമുതല്‍ വിദേശികള്‍ എല്ലാവര്‍ഷവും ലൈസന്‍സ് പുതുക്കേണ്ടിവരും. ലൈസന്‍സ് പുതുക്കുന്നത് ഒരു വര്‍ഷത്തേക്ക് മാത്രമാക്കി. നിലവില്‍ 3 വര്‍ഷമായിരുന്നു വിദേശികളുടെ ലൈസന്‍സ് കാലാവധി. ഇതാണ് അധികൃതര്‍ ചുരുക്കിയിരിക്കുന്നത്. എന്നാല്‍ ഹൗസ് ഡ്രൈവര്‍മാരുടെ ലൈസന്‍സ് കാലാവധി മൂന്ന് വര്‍ഷമായി തുടരും.

3 വര്‍ഷം കാലാവധിയുള്ള ഡ്രൈവിങ് ലൈസന്‍സ് മാറ്റുന്നതിലുള്ള നിബന്ധനകള്‍ പാലിക്കാതായതോടെയാണ് നിയന്ത്രണങ്ങള്‍ കടുപ്പിക്കാന്‍ തീരുമാനിച്ചിരിക്കുന്നത്. നേരത്തെ 10 വര്‍ഷത്തേക്കാണ് ലൈസന്‍സ് നല്‍കിയിരുന്നത്. ഇത് പിന്നീട് 3 വര്‍ഷത്തേക്ക് മാറ്റുകയായിരുന്നു. അതാണ് ഇപ്പോള്‍ ഒരു വര്‍ഷത്തേക്ക് മാറ്റിയിരിക്കുന്നത്. കഴിഞ്ഞ ദിവസം മുതലാണ് ഒരു വര്‍ഷത്തേക്ക് മാത്രമാക്കി നിയമം എത്തിയത്.

വിദേശി ഗതാഗത നിയമലംഘനങ്ങള്‍ നടത്തുന്നത് കണ്ടെത്തിയാല്‍ ശിക്ഷ ലഭിക്കും. 15 ബ്ലാക്ക് പോയിന്റ് നിയമ ലംഘനത്തില്‍ കണ്ടെത്തിയാല്‍ 3 മാസത്തേക്ക് ഡ്രൈവറുടെ ലൈസന്‍സ് പിന്‍വലിക്കും. രണ്ടാം തവണ 12 പോയിന്റ് ലഭിച്ചാല്‍ 6 മാസത്തേക്ക് ലൈസന്‍സ് പിന്‍വലിക്കും മൂന്നാം തവണയും 10 പോയിന്റ് കവിഞ്ഞാല്‍ 9 മാസത്തേക്ക് ഡ്രൈവറുടെ ലൈസന്‍സ് പിന്‍വലിക്കും. നാലാം തവണ 8 പോയിന്റ് കവിഞ്ഞാല്‍ ഒരു വര്‍ഷത്തേക്ക് ലൈസന്‍സ് താല്‍ക്കാലികമായി പിന്‍വലിക്കും.

കൂടാതെ അഞ്ചാമത്തെ തവണയും നിയമലംഘനം ആവര്‍ത്തിക്കുകയാണെങ്കില്‍ ഡ്രൈവറുടെ ലൈസന്‍സ് പിന്‍വലിക്കാന്‍ ആണ് തീരുമാനിച്ചിരിക്കുന്നത്.

Change in the period of renewal of driving license of foreigners in Kuwait