ഒരു കാറോട്ട വീഡിയോയാണ് ഇപ്പോള്‍ സമൂഹ മാധ്യമങ്ങളില്‍ തരംഗം സൃഷ്ടിക്കുന്നത്. ഡ്രൈവര്‍ 192 കി.മീ വേഗത്തില്‍ കാറോടിക്കുന്നു എന്നതാണ് വീഡിയോയുടെ സവിശേഷത. ഇത്രയും വേഗതയില്‍ കാറോടിക്കുന്നത് രണ്ടു കണ്ണുകള്‍ക്കും കാഴ്ച്ചയില്ലാത്ത വ്യക്തിയാണ് എന്ന് അറിയുമ്പോഴാണ് ശരിക്കും കാഴ്ച്ചക്കാര്‍ ഞെട്ടുന്നത്. 1320 എന്ന യൂട്യൂബ് ചാനലിലാണ് കാഴ്ച ശേഷിയില്ലാത്ത ഷെല്‍ഡന്‍ എന്ന വ്യക്തി കാറോടിക്കുന്ന വീഡിയോ പോസ്റ്റ് ചെയ്യപ്പെട്ടിരിക്കുന്നത്. അലാസ്‌ക റേസ്‌വേ പാര്‍ക്കിലാണ് ഷെല്‍ഡന്‍ തന്റെ 2022 ഡോഡ്ജ് സൂപ്പര്‍ സ്റ്റോക് ചാലഞ്ചര്‍ എസ്ആര്‍ടി പരീക്ഷണ ഓട്ടം നടത്തിയത്.

സുഹ്യത്തിന്റെ നിര്‍ദേശപ്രകാരമാണ് ഷെല്‍ഡന്‍ കാറോടിക്കുന്നത് എന്നാണ് വീഡിയോയിലെ ദൃശ്യങ്ങളില്‍ നിന്നും മനസിലാക്കാന്‍ സാധിക്കുന്നത്. വെറും 11.5 സെക്കന്‍ഡില്‍ മണിക്കൂറില്‍ 192.8 കിലോമീറ്റര്‍ വേഗതയില്‍ ഷെല്‍ഡന്‍ ക്വാര്‍ട്ടര്‍ മൈല്‍ ദൂരം പിന്നിടുന്നതായി കാണാന്‍ സാധിക്കും. തന്റെ കാഴ്ച ശക്തിയുള്ള സുഹൃത്ത് ഓടിക്കുന്നതിനേക്കാള്‍ വേഗതയിലാണ് ഷെല്‍ഡന്‍ കാര്‍ ഓടിക്കുന്നത്. അതേസമയം ഡാന്‍ പാര്‍ക്കറാണ് ലോകത്തിലെ ഏറ്റവും വേഗതയേറിയ കാഴ്ച ശക്തിയില്ലാത്ത ഡ്രൈവര്‍ എന്ന് അറിയപ്പെടുന്നത്.

Content Highlights:blind drag racer pushes dodge challenger hellcat to 11 5 second in quarter mile