2020 October 22 Thursday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

എച്ച്‌.ഐ.വിയെ കീഴ്‌പ്പെടുത്തിയ ആദ്യ രോഗി തിമോത്തി ബ്രൗണ്‍ അന്തരിച്ചു

പി.പി ചെറിയാന്‍

 

പാം സ്പ്രിങ്‌സ് (കാലിഫോര്‍ണിയ): ആധുനിക വൈദ്യശാസ്ത്ര ചരിത്രത്തില്‍ എച്ച്‌ഐവി രോഗം പൂര്‍ണമായും മാറിയ ആദ്യ രോഗി തിമോത്തി റെ ബ്രൗണ്‍ കാലിഫോര്‍ണിയ പാം സ്പ്രിങ്‌സില്‍ അന്തരിച്ചു. അമ്പത്തിനാലു വയസായിരുന്നു. ബര്‍ലിന്‍ പേഷ്യന്റ് എന്നാണ് ഇദ്ദേഹം അറിയപ്പെട്ടിരുന്നത്.

1990 ലാണ് തിമോത്തിക്ക് എച്ച്‌ഐവി ഉണ്ടെന്ന് പരിശോധനയില്‍ കണ്ടെത്തിയത്. 2006 ല്‍ ലുക്കീമിയ സ്ഥിരീകരിച്ചു. 2007, 2008 വര്‍ഷങ്ങളില്‍ മറ്റൊരു രോഗിയില്‍ നിന്നും സ്‌റ്റെം സെല്‍ ട്രാന്‍സ് പ്ലാന്റ് ലഭിച്ചതോടെ എച്ച്‌ഐവിയും ലുക്കീമിയയും അപ്രത്യക്ഷമായി.

എച്ച്‌ഐവി നെഗറ്റീവായതിനുശേഷം ഒരിക്കല്‍ പോലും പിന്നീടുള്ള പരിശോധനയില്‍ എച്ച്‌ഐവി പോസിറ്റീവായിരുന്നില്ല. എച്ച്‌ഐവി പൂര്‍ണമായും മാറുന്ന രോഗമാണെന്ന് തിമോത്തി ആദ്യമായി തെളിയിച്ചതായി കലിഫോര്‍ണിയ യൂണിവേഴ്‌സിറ്റി എയ്ഡ്‌സ് സ്‌പെഷ്യലിസ്റ്റ് സ്റ്റീവന്‍ ഡീക്‌സ് അഭിപ്രായപ്പെട്ടു.

അടുത്തിടെയായി ലുക്കീമിയ തിമോത്തിയില്‍ വീണ്ടും പ്രത്യക്ഷമായി. മരണം കാന്‍സര്‍ മൂലമാണെന്ന് ഡോക്ടര്‍മാര്‍ പറയുന്നു. എച്ച്‌ഐവി വിദഗ്ധ ടീം അംഗങ്ങള്‍ ഉള്‍പ്പെടുന്ന ഇന്റര്‍ നാഷനല്‍ എയ്ഡ്‌സ് സൊസൈറ്റി തിമോത്തിയുടെ മരണം നിര്‍ഭാഗ്യകരമെന്ന് വിശേഷിപ്പിച്ചുവെങ്കിലും ശാസ്ത്ര ലോകത്തിലേക്ക് പുതിയൊരു വാതായനം തുറന്നിട്ടാണ് ബ്രൗണ്‍ മരണത്തിന് കീഴടങ്ങിയതെന്ന് പ്രസ്താവനയില്‍ ചൂണ്ടിക്കാട്ടി.

Advt.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.