2022 November 30 Wednesday
ലോകത്തില്‍ മാറ്റങ്ങള്‍ വരണമെന്ന് ഏവരും ആഗ്രഹിക്കുന്നു. എന്നാല്‍ സ്വയം മാറ്റത്തിനു വിധേയനവാന്‍ ആരും തയ്യാറല്ല താനും. ലിയോ ടോള്‍സ്റ്റോയ്

ഐ ഫോണ്‍-14 ഇന്ത്യയില്‍ നിര്‍മാണം തുടങ്ങി

ബെയ്ജിങ്: ആപ്പിള്‍ കമ്പനിയുടെ ഐ ഫോണ്‍-14 ഹാന്‍ഡ്‌സെറ്റുകള്‍ ഇന്ത്യയില്‍ നിര്‍മാണം തുടങ്ങി. അമേരിക്കയും ചൈനയും തമ്മിലുള്ള ബന്ധങ്ങള്‍ വഷളായതിനാലണ് ചൈനയ്ക്ക് പുറത്തേക്ക് ഉല്‍പ്പാദനം മാറ്റുന്നതെന്നാണ് റിപ്പോര്‍ട്ട്. ആപ്പിള്‍ കമ്പനിയുടെ ഐ ഫോണുകള്‍ നിര്‍മിക്കുന്ന പ്രധാന രാജ്യങ്ങളിലൊന്നാണ് ചൈന. ലോക്ഡൗണ്‍ ഉള്‍പ്പെടെ കൊവിഡ് നിയന്ത്രണങ്ങള്‍ ചൈനയില്‍ രൂക്ഷമായി തുടരുന്നതും ആപ്പിളിനെ മാറിചിന്തിക്കാന്‍ പ്രേരിപ്പിക്കുന്നു.

ഐ ഫോണിന്റെ ഏറ്റവും പുതിയ മോഡലായ 14 ഈ മാസത്തിന്റെ തുടക്കത്തിലാണ് ആപ്പിള്‍ പുറത്തിറക്കിയത്. യു.എ.ഇ ഉള്‍പ്പെടെ തെരഞ്ഞെടുക്കപ്പെട്ട ഏതാനും രാജ്യങ്ങളില്‍ മാത്രമാണ് ഇപ്പോള്‍ വിതരണം. പുതിയ സാങ്കേതിക സവിശേഷതകളോടെയും സുരക്ഷാ സംവിധാനങ്ങളോടെയുമാണ് ഐ ഫോണ്‍14 പുറത്തിറക്കുന്നതെന്നും ഇന്ത്യയില്‍ ഇത് നിര്‍മിക്കുന്നത് പ്രതീക്ഷയോടെയാണ് കാത്തിരിക്കുന്നതെന്നും ആപ്പിള്‍ പ്രസ്താവനയില്‍ പറഞ്ഞു. ഉല്‍പ്പാദനം തുടങ്ങിയെങ്കിലും വിതരണം ആരംഭിച്ചിട്ടില്ല.

നിലവില്‍ ഐ ഫോണിന്റെ പഴയ മോഡലുകള്‍ ഇന്ത്യയില്‍ നിര്‍മിക്കുന്നുണ്ട്. 2017 മുതല്‍ തമിഴ്‌നാട്ടിലാണ് ഹാന്‍ഡ്‌സെറ്റുകള്‍ നിര്‍മിച്ചുവരുന്നത്. തായ്‌വാന്‍ കമ്പനിയായ ഫോക്‌സ്‌കോന്‍ ആണ് ഐ ഫോണ്‍-14ന്റെ നിര്‍മാതാക്കള്‍. ഇനി മുതല്‍ ഐ ഫോണ്‍-14 ഇന്ത്യയില്‍ ധാരാളമായി നിര്‍മിക്കാനാണ് അമേരിക്കന്‍ ഭീമന്‍മാരായ ആപ്പിള്‍ ഉദ്ദേശിക്കുന്നത്.

ഇന്ത്യന്‍ വിപണി കീഴടക്കിയ കൊറിയന്‍, ചൈനീസ് ഫോണുകള്‍ക്ക് വെല്ലുവിളി ഉയര്‍ത്താനും ഇതിലൂടെ ആപ്പിളിന് സാധിക്കും. ഇന്ത്യയില്‍ നിര്‍മിച്ചാലും ഐ ഫോണിന് വില കുറയില്ല. ഉയര്‍ന്ന ഇറക്കുമതി തീരുവയും മറ്റ് നികുതികളും കാരണമാണിത്. പ്രധാനമന്ത്രിയുടെ മെയ്ക് ഇന്‍ ഇന്ത്യ പദ്ധതിയുടെ ഭാഗമായി ഇന്ത്യയില്‍ കൂടുതല്‍ കമ്പനികളെത്തുന്നുവെന്ന പ്രതീതി ഉണര്‍ത്താന്‍ കേന്ദ്ര സര്‍ക്കാരിന് ഐ ഫോണ്‍ ഉല്‍പ്പാദന വര്‍ധനവിലൂടെ സാധിക്കും. 2025ഓടെ ആകെ ഐ ഫോണ്‍ ഉള്‍പ്പാദനത്തിന്റെ നാലിലൊന്നും ഇന്ത്യയിലായിരിക്കുമെന്നാണ് റിപ്പോര്‍ട്ടുകള്‍.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

Advt.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Comments are closed for this post.