2022 July 05 Tuesday
നല്ല മനുഷ്യന്‍ സ്‌നേഹം മൂലം അനുസരിക്കുന്നു, അല്ലാത്തവന്‍ ഭയം മൂലവും.       അരിസ്റ്റോട്ടില്‍

സഹോദരനൊപ്പം നടന്നുപോകവേ ടിപ്പര്‍ലോറി ഇടിച്ച് എട്ടു വയസുകാരന് ദാരുണാന്ത്യം

കുറ്റ്യാടി-ആയഞ്ചേരി റോഡില്‍ വടയം ടൗണില്‍ വച്ചാണ് അപകടം

കുറ്റ്യാടി: സഹോദരനൊപ്പം നടന്നു പോകവേ ടിപ്പര്‍ലോറി ഇടിച്ച് എട്ടു വയസുകാരന് ദാരുണാന്ത്യം. വടയം ചുണ്ടേമ്മല്‍ അസ്ലം-ഉമൈറ ദമ്പതികളുടെ മകന്‍ മുഹമ്മദ് അഫ്‌നാന്‍ ആണ് മരിച്ചത്. ഇന്നലെ വൈകീട്ട് 5.30തോടെ കുറ്റ്യാടി-ആയഞ്ചേരി റോഡില്‍ വടയം ടൗണില്‍ വച്ചാണ് അപകടം.

പഴയ വീട്ടില്‍നിന്ന് നിലവില്‍ താമസിക്കുന്ന 800 മീറ്റര്‍ അകലെയുള്ള ടൗണിലെ ഫ്‌ളാറ്റിലേക്ക് ജ്യേഷ്ഠന്‍ മുഹമ്മദ് അദ്‌നാനൊപ്പം ഓട്ടോയിലാണ് പോയത്. ഓട്ടോയിറങ്ങി ഫ്‌ളാറ്റിലേക്ക് നടക്കവേ കുറ്റ്യാടിയില്‍നിന്ന് ആയഞ്ചേരി ഭാഗത്തേക്ക് പോവുകയായിരുന്ന ടിപ്പര്‍ അഫ്‌നാനെ ഇടിക്കുകയായിരുന്നു. അപകടത്തില്‍ ഗുരുതരമായി പരുക്കേറ്റ അഫ്‌നാനെ കുറ്റ്യാടി ഗവ. ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. ടിപ്പര്‍ ലോറിയുടെ അമിത വേഗതയാണ് അപകട കാരണമെന്ന് ദൃക്‌സാക്ഷികള്‍ പറഞ്ഞു.

അതേസമയം, റോഡ് മുറിച്ചുകടക്കവേയാണ് അപടകമുണ്ടായതെന്നും ടിപ്പര്‍ കുട്ടിയുടെ ശരീരത്തിലൂടെ കയറി ഇറങ്ങിയതായും പറയപ്പെടുന്നു. നിട്ടൂര്‍ പൊയില്‍മുക്ക് ദാറുല്‍ഹുദ ഇസ്ലാമിക് സെന്റര്‍ മദ്‌റസയില്‍ രണ്ടാം ക്ലാസിലും വടയം സൗത്ത് എല്‍.പി സ്‌കൂളില്‍ മൂന്നാം ക്ലാസ് വിദ്യാര്‍ഥിയുമാണ്. പിതാവ് അസ്ലം ദുബൈയില്‍ കഫ്ത്തീരിയ ജീവനക്കാരനാണ്. മൃതദേഹം പോസ്റ്റ്‌മോര്‍ട്ടത്തിനായി കുറ്റ്യാടി ഗവ. താലൂക്ക് ആശുപത്രിയില്‍ സൂക്ഷിച്ചിരിക്കുകയാണ്.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

Advt.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.