2021 June 23 Wednesday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

സുരേന്ദ്രനെതിരേയുള്ള ആരോപണങ്ങള്‍ കേന്ദ്രനേതൃത്വത്തിന് അതൃപ്തി; തല്‍ക്കാലം നടപടിയില്ല

ന്യൂഡല്‍ഹി: കേരളത്തിലെ ബി.ജെ.പിയെ ഉലച്ച തെരഞ്ഞെടുപ്പു തോല്‍വിയിലും കുഴല്‍പ്പണ, കോഴ ആരോപണത്തിലും അതൃപ്തി അറിയിച്ച കേന്ദ്രനേതൃത്വം പക്ഷെ സംസ്ഥാന അധ്യക്ഷന്‍ കെ.സുരേന്ദ്രന്‍ അടക്കമുള്ള നേതാക്കള്‍ക്കെതിരേ തല്‍ക്കാലം നടപടിയെടുക്കേണ്ടതില്ലെന്ന നിലപാടില്‍. പ്രതിസന്ധി സമയത്ത് നേതാക്കള്‍ക്കെതിരേ നടപടിയെടുത്താല്‍ പാര്‍ട്ടി കൂടുതല്‍ ദുര്‍ബലമാകുകയും തളരുകയും ചെയ്യുമെന്നു തിരിച്ചറിഞ്ഞ കേന്ദ്രനേതൃത്വത്തിന്റെ നിലപാട് കെ.സുരേന്ദ്രന് തല്‍ക്കാലം അനുഗ്രഹമായിരിക്കുകയാണ്. കേന്ദ്രമന്ത്രി വി. മുരളീധരന്‍, കെ.സുരേന്ദ്രന്‍ എന്നിവരാണ് ഇന്നലെ ദേശീയ അധ്യക്ഷന്‍ ജെ.പി നദ്ദയെ കണ്ടത്. ആരോപണങ്ങളെ രാഷ്ട്രീയമായും നിയമപരമായും നേരിടാന്‍ നദ്ദ നിര്‍ദേശം നല്‍കി. നിയമസഭാ തെരഞ്ഞെടുപ്പ് പരാജയത്തിലും വിവാദങ്ങളിലും അദ്ദേഹം അതൃപ്തി അറിയിച്ചു. സംഘടനാ പ്രശ്‌നങ്ങള്‍ പരിഹരിച്ച് പാര്‍ട്ടിയെ ശക്തിപ്പെടുത്താന്‍ ഉടന്‍ നടപടിയുണ്ടാകുമെന്ന് അറിയിച്ച കേന്ദ്രനേതൃത്വം ഇപ്പോഴത്തെ സാഹചര്യത്തില്‍ അച്ചടക്ക നടപടിയോ നേതൃമാറ്റമോ ഉണ്ടായാല്‍ അതു ആത്മഹത്യാപരമായിരിക്കുമെന്ന നിഗമനത്തിലാണ് എത്തിയത്. നേതൃത്വത്തിന്റെ പക്വതകുറവും ഏകാധിപത്യ നിലപാടുമാണ് തിരിച്ചടിക്ക് കാരണമായതെന്ന വിലയിരുത്തലിലാണ് കേന്ദ്രനേതൃത്വം.

കുഴല്‍പ്പണക്കേസ്, സി.കെ ജാനുവിനെ എന്‍.ഡി.എയില്‍ എത്തിക്കാന്‍ കോഴ നല്‍കിയ വിവാദം, തെരഞ്ഞെടുപ്പ് ഫണ്ട് വിനിയോഗം, തെരഞ്ഞെടുപ്പ് തിരിച്ചടി എന്നിവയില്‍ സുരേന്ദ്രന്‍ വിശദീകരണം നല്‍കി. ഇതുസംബന്ധിച്ച് മുന്‍ ഐ.എ.എസ് ഉദ്യോഗസ്ഥന്‍ സി.വി ആനന്ദബോസ് നല്‍കിയ റിപ്പോര്‍ട്ടും കേന്ദ്രനേതൃത്വം പരിഗണിച്ചു. ഗ്രൂപ്പ് പോരാണ് പ്രശ്‌നങ്ങള്‍ വഷളാക്കിയതെന്നും ഇത് എത്രയും പെട്ടന്ന് അവസാനിപ്പിക്കണമെന്നും നദ്ദ മുന്നറിയിപ്പ് നല്‍കി. ഡല്‍ഹിയിലുള്ള സുരേന്ദ്രന്‍ ഇന്ന് ദേശീയ ജനറല്‍ സെക്രട്ടറി ബി.എല്‍ സന്തോഷിനെ കാണുന്നുണ്ട്.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

Advt.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.