2021 May 07 Friday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

കേരളത്തില്‍ റിസര്‍വേഷനില്ലാത്ത ട്രെയിന്‍ യാത്ര വൈകും

 

കോഴിക്കോട്: അണ്‍റിസര്‍വ്ഡ് ട്രെയിന്‍ യാത്രയ്ക്ക് മലയാളി ഇനിയും കാത്തിരിക്കേണ്ടിവരും. ലോക്കല്‍ പാസഞ്ചര്‍ ട്രെയിനുകള്‍ ഓടിക്കുന്ന കാര്യത്തിലും ടിക്കറ്റ് റിസര്‍വ് ചെയ്യാതെ എക്‌സ്പ്രസ് ട്രെയിനുകളില്‍ യാത്ര അനുവദിക്കുന്നതിലും റെയില്‍വേ തീരുമാനം നീട്ടിക്കൊണ്ടുപോവുകയാണ്.
റെയില്‍വേയുടെ വടക്കന്‍ മേഖലയില്‍ 35 അണ്‍ റിസര്‍വ്ഡ് ട്രെയിനുകള്‍ ഓടിക്കാന്‍ നടപടിയായി. മെമു, എമു എന്നിവ ഉള്‍പ്പെടെയാണിത്.
എന്നാല്‍ കേരളത്തില്‍ ടിക്കറ്റ് റിസര്‍വേഷന്‍ ആവശ്യമില്ലാത്ത ട്രെയിനുകള്‍ ഓടാന്‍ മെയ് വരെ കാത്തിരിക്കേണ്ടിവരുമെന്നാണ് അധികൃതര്‍ പറയുന്നത്. നിലവില്‍ ഏറ്റവും കൂടുതല്‍ യാത്രക്കാര്‍ ഉള്ള എക്‌സ്പ്രസ് ട്രെയിനുകളിലെല്ലാം ടിക്കറ്റ് റിസര്‍വ് ചെയ്ത് മാത്രമേ യാത്ര ചെയ്യാന്‍ സാധിക്കൂ എന്നത് യാത്രക്കാരെ ഏറെ ബുദ്ധിമുട്ടിക്കുന്നു. ഈ ട്രെയിനുകളില്‍ ടിക്കറ്റ് റിസര്‍വ് ചെയ്യാതെ യാത്ര അനുവദിക്കണമെന്ന ആവശ്യം ശക്തമാണ്.

കോയമ്പത്തൂര്‍-മംഗലാപുരം ഇന്റര്‍സിറ്റി ഉള്‍പ്പെടെയുള്ള എക്‌സ്പ്രസ് ട്രെയിനുകളുടെ സ്‌റ്റോപ്പുകള്‍ വെട്ടിക്കുറച്ചതും പ്രയാസമുണ്ടാക്കുന്നു. റിസര്‍വേഷന്‍ സംവിധാനത്തിലൂടെ സര്‍വീസ് ആയതോടെയും യാത്രക്കാര്‍ കുറഞ്ഞതുകാരണവുമാണ് സ്‌റ്റോപ്പുകള്‍ വെട്ടിക്കുറച്ചതെന്നാണ് റെയില്‍വേ പറയുന്നത്.
ടിക്കറ്റ് റിസര്‍വേഷന്‍ ഇല്ലാതെ സര്‍വീസ് തുടങ്ങിയാലും റദ്ദാക്കിയ സ്റ്റോപ്പുകള്‍ പുന:സ്ഥാപിക്കില്ലെന്ന് റെയില്‍വേ വ്യക്തമാക്കിയിട്ടുണ്ട്. കോയമ്പത്തൂര്‍-മംഗലാപുരം ഇന്റര്‍സിറ്റി, മംഗലാപുരം-നാഗര്‍കോവില്‍ പരശുറാം തുടങ്ങിയ ചില ട്രെയിനുകള്‍ സ്വകാര്യമേഖലയ്ക്ക് വിട്ടുകൊടുക്കാന്‍ ആലോചിക്കുന്നതായും റെയില്‍വേയുമായി ബന്ധപ്പെട്ട വൃത്തങ്ങള്‍ സൂചിപ്പിക്കുന്നുണ്ട്.
കൊവിഡ് രൂക്ഷമാകുന്നതിന്റെ പേരിലാണ് ടിക്കറ്റ് റിസര്‍വേഷന്‍ ഇല്ലാത്ത യാത്രയ്ക്ക് അനുമതി നിഷേധിക്കുന്നതെങ്കിലും സ്വകാര്യവല്‍ക്കരണം വേഗത്തിലാക്കാനുള്ള അജണ്ടയാണ് യഥാര്‍ഥ കാരണമെന്ന് ആരോപണമുയര്‍ന്നിട്ടുണ്ട്.

ട്രെയിനുകളില്‍ സാമൂഹ്യ അകലം പോലും പാലിക്കാതെ, റിസര്‍വ് ചെയ്യുന്നവര്‍ക്ക് ടിക്കറ്റ് കൊടുക്കുന്ന റെയില്‍വേ, കൊവിഡിനെ പഴിപറഞ്ഞ് അണ്‍ റിസര്‍വ്ഡ് ട്രെയിനുകള്‍ ഓടിക്കാത്തത് ഇരട്ടത്താപ്പാണെന്ന് റെയില്‍വേ പാസഞ്ചേഴ്‌സ് അസോസിയേഷന്‍ ചൂണ്ടിക്കാട്ടുന്നു.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

Advt.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Latest News