2021 May 16 Sunday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

‘കൊവിഡ് ചികിത്സ: മെഡിക്കല്‍ കോളജില്‍ നടക്കുന്നത് കൊലപാതകങ്ങള്‍’ രൂക്ഷവിമര്‍ശനവുമായി മുന്‍ മാധ്യമപ്രവര്‍ത്തകന്‍

തിരുവനന്തപുരം: തലസ്ഥാനത്തെ പ്രമുഖ കൊവിഡ് ചികിത്സാ കേന്ദ്രമായ തിരുവനന്തപുരം മെഡിക്കല്‍ കോളജ് ആശുപത്രിയിലെ ജീവനക്കാര്‍ക്കെതിരേ രൂക്ഷ വിമര്‍ശനവുമായി മുന്‍ മാധ്യമ പ്രവര്‍ത്തകനായ ഹരിഹരന്‍.
 
 തിരുവനന്തപുരം മെഡിക്കല്‍ കോളജില്‍ ജീവനക്കാരുടെ കെടുകാര്യസ്ഥതയും അരും കൊലപാതകങ്ങളുമാണ് നടക്കുന്നതെന്നും അദ്ദേഹം ഫേസ്ബുക്കില്‍ പോസ്റ്റ് ചെയ്ത വിഡിയോയില്‍ ആരോപിച്ചു. കൃത്യമായ മാര്‍ഗനിര്‍ദേശവും പരിചരണവും നല്‍കാതെ അധികൃതര്‍ തന്നെ പീഡിപ്പിച്ചുവെന്ന് അദ്ദേഹം വിഡിയോയില്‍ പറയുന്നു.
കൊവിഡ് പോസിറ്റീവ് ആയതിനെ തുടര്‍ന്ന് ഏപ്രില്‍ മൂന്നിനാണ് ഹരിഹരനെ ആശുപത്രിയില്‍ പ്രവേശിപ്പിച്ചത്. മെഡിക്കല്‍ കോളജ് കൊവിഡ് വാര്‍ഡിലെ രോഗികളുടെ പ്രാഥമിക ആവശ്യങ്ങള്‍ പോലും നിറവേറ്റാതെയാണ് പാര്‍പ്പിച്ചിരിക്കുന്നതെന്ന് ഹരിഹരന്‍ ആരോപിച്ചു. ചികിത്സ തേടിയ കാലയളവില്‍ ഒപ്പമുണ്ടായിരുന്ന മറ്റ് രോഗികള്‍ പല തവണ അപേക്ഷിച്ചിട്ടും അവരെ ശുചിമുറിയില്‍ കൊണ്ടുപോകാന്‍ ജീവനക്കാര്‍ തയാറായില്ല. രോഗികള്‍ക്കായി ഉപയോഗിക്കുന്ന വെന്റിലേറ്ററുകള്‍ പോലും ശരിയായല്ല പ്രവര്‍ത്തിപ്പിക്കുന്നത്. തനിക്ക് സമീപത്തെ ബെഡില്‍ കഴിഞ്ഞിരുന്ന ഒരു സ്ത്രീയ്ക്കുണ്ടായ അവസ്ഥയും പിന്നീട് അവര്‍ മരണമടയുന്നതിന്റേയും അനുഭവങ്ങളും ഹരിഹരന്‍ വിഡിയോയിലൂടെ പങ്കുവച്ചു.ഇതോടൊപ്പം അഭയ കെയര്‍ ഹോമില്‍ നിന്നു വന്ന ജോസഫ് എന്നയാളുടെ മരണകാരണവും അമിതമായ അളവില്‍ ഓക്‌സിജന്‍ നല്‍കിയതിനെ തുടര്‍ന്നാണെന്നും അദ്ദേഹം ആരോപിച്ചു. ചികിത്സയ്‌ക്കെത്തുന്ന രോഗികള്‍ക്ക് ബന്ധുക്കളുമായി ബന്ധപ്പെടാന്‍ ജീവനക്കാര്‍ അവസരം നല്‍കുന്നില്ല.
 
 രോഗികളെ പാര്‍പ്പിച്ചിരിക്കുന്ന സ്ഥലത്ത് വേണ്ടത്ര ഡോക്ടര്‍മാര്‍ പോലുമില്ല. തിരുവനന്തപുരം മെഡിക്കല്‍ കോളജില്‍ ചികിത്സയ്‌ക്കെന്ന പേരില്‍ കൊലപാതകങ്ങളാണ് നടക്കുന്നത്. അധികാരികള്‍ ഇനിയെങ്കിലും വേണ്ട നടപടി സ്വീകരിക്കണമെന്നും അദ്ദേഹം വിഡിയോയില്‍ ആവശ്യപ്പെട്ടു.

ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

Advt.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.