ന്യൂഡല്‍ഹി: രാജ്യത്ത് രണ്ട് ഡോസ് വാക്‌സിനും എടുത്ത 87,000 ത്തിലധികം പേര്‍ക്ക് കൊവിഡ് സ്ഥിരീകരിച്ചതായി ആരോഗ്യമന്ത്രാലയം.
ബ്രേക്ക്ത്രൂ ഇന്‍ഫെക്ഷന്‍ എന്ന ഈ പ്രതിഭാസം പിടിപെട്ടവരില്‍ 46 ശതമാനവും കേരളത്തിലാണ്. സംസ്ഥാനത്ത് ആദ്യ ഡോസ് സ്വീകരിച്ച 80,000 പേര്‍ക്കാണ് കൊവിഡ് പിടിപെട്ടത്. രണ്ട് ഡോസും സ്വീകരിച്ച 40,000 പേര്‍ക്കും കൊവിഡ് സ്ഥിരീകരിച്ചെന്നും മന്ത്രാലയം പറഞ്ഞു.
വാക്‌സിന്‍ സ്വീകരിച്ചവരില്‍ കൊവിഡ് റിപ്പോര്‍ട്ട്‌ചെയ്യുന്ന സംഭവം കൂടുതല്‍ പത്തനംതിട്ടയിലാണ്. സംസ്ഥാനത്തെ ആകെ കേസുകളുടെ പകുതിയും ജില്ലയിലാണ്. സമ്പൂര്‍ണ വാക്‌സിനേഷന്‍ പൂര്‍ത്തിയാക്കിയ ജില്ലയെന്ന വിശേഷണമുള്ള വയനാട്ടിലും വാക്‌സിനെടുത്തവര്‍ക്ക് കൊവിഡ് വന്നിട്ടുണ്ട്. വാക്‌സിന്‍ സ്വീകരിച്ചവരില്‍ കൊവിഡ് കൂടുതലായി കണ്ടെത്തുന്നത് ആശങ്കയോടെയാണ് കേന്ദ്രസര്‍ക്കാര്‍ കാണുന്നത്.
ഇത്തരക്കാരുടെ 200 സാംപിളുകള്‍ ജനിതകപരിശോധനയ്ക്ക് വിധേയമാക്കിയെങ്കിലും കൊവിഡിന്റെ പുതിയ വകഭേദമൊന്നും കണ്ടെത്താനായിട്ടില്ല.