2024 March 02 Saturday
രാജീവ് ഗാന്ധി വധക്കേസില്‍ ജയില്‍മോചിതനായ ശാന്തന്‍ മരിച്ചു

27 എ.എ.പി എം.എല്‍.എമാരെ അയോഗ്യരാക്കാനുള്ള ആവശ്യം രാഷ്ട്രപതി തള്ളി

ന്യൂഡല്‍ഹി: വരുമാനം ലഭിക്കുന്ന പദവി വഹിച്ചെന്ന ആരോപിച്ച് ഡല്‍ഹി ഭരിക്കുന്ന ആം ആദ്മി പാര്‍ട്ടിയുടെ 27 എം.എല്‍.എമാരെ അയോഗ്യരാക്കണമെന്ന ആവശ്യം രാഷ്ട്രപതി രാംനാഥ് കോവിന്ദ് തള്ളി. ഇതുസംബന്ധിച്ച് തെരഞ്ഞെടുപ്പ് കമ്മിഷന്റെ നിര്‍ദേശപ്രകാരമാണ് രാഷ്ട്രപതിയുടെ നടപടി. ആരോപണത്തില്‍ കഴമ്പില്ലെന്ന് നേരത്തെ തെരഞ്ഞെടുപ്പ് കമ്മിഷന്‍ രാഷ്ട്രപതിഭവനെ അറിയിച്ചിരുന്നു.

2016 ജൂണില്‍ നിയമ വിദ്യാര്‍ഥിയായ വിഭോര്‍ ആനന്ദാണ് രോഗി കല്യാണ്‍ സമിതിയുടെ അധ്യക്ഷസ്ഥാനത്തേക്ക് മുഖ്യമന്ത്രി അരവിന്ദ് കെജ്‌രിവാള്‍ 27 എം.എല്‍.എമാരെ നിയമിച്ചത് ചോദ്യം ചെയ്ത് തെരഞ്ഞെടുപ്പ് കമ്മീഷന് കത്തയച്ചത്. എം.എല്‍.എമാര്‍ക്ക് അംഗമാവാന്‍ മാത്രമേ ചട്ടം അനുവദിക്കുന്നുള്ളൂ എന്നായിരുന്നു പരാതിക്കാരന്റെ വാദം. അധ്യക്ഷ പദവി സാമ്പത്തിക ആനുകൂല്യം പറ്റുന്ന പദവിയാണന്നും അതിനാല്‍ എം.എല്‍.എമാരുടെ ചട്ടലംഘനം പരിശോധിക്കണമെന്നുമാണ് പരാതി.

പരാതി കമ്മിഷന്‍ രാഷ്ട്രപതിയുടെ മുമ്പാകെ അയച്ചു. പരാതി പരിശോധിച്ച രാഷ്ട്രപതി ഭവന്‍, ഇക്കാര്യത്തില്‍ നിലപാടെടുക്കാന്‍ കമ്മിഷനെ ചുമതലപ്പെടുത്തി. പരാതി പരിശോധിച്ച കമ്മിഷന്‍ ഇതുസംബന്ധിച്ച ആരോപണത്തില്‍ കഴമ്പില്ലെന്നു കണ്ടതിനെത്തുടര്‍ന്ന് പരാതി തള്ളാന്‍ രാഷ്ട്രപതിഭവന് ശുപാര്‍ശ ചെയ്തു. ഈ ശുപാര്‍ശ അംഗീകരിച്ച് രാഷ്ട്രപതി ഭവന്‍ ഇന്നലെ ഉത്തരവ് പുറപ്പെടുവിക്കുകയായിരുന്നു. പരാതി പരിഗണിച്ച് 27 എം.എല്‍.എമാരെയും അയോഗ്യരാക്കിയിരുന്നുവെങ്കില്‍ ഡല്‍ഹിയിലെ എ.എ.പി സര്‍ക്കാരിന് അത് ഭീഷണിയാവില്ലെങ്കിലും സര്‍ക്കാരിന്റെ പ്രതിച്ഛായയെ ബാധിക്കുമായിരുന്നു. 70 അംഗ നിയമസഭയില്‍ കേവലഭൂരിപക്ഷത്തിന് 36 അംഗങ്ങള്‍ മതിയെങ്കില്‍ എ.എ.പിക്ക് 66 എം.എല്‍.എമാരാണുള്ളത്. സഭയില്‍ പ്രതിപക്ഷനിരയില്‍ നാലു എം.എല്‍.എമാര്‍ മാത്രമെയുള്ളൂ. നാലുപേരും ബി.ജെ.പി അംഗങ്ങളാണ്.

2009ല്‍ ഷീലാ ദീക്ഷിത് മുഖ്യമന്ത്രിയായിരിക്കെയാണ് ഓരോ മണ്ഡലത്തിലും രോഗികല്യാണ്‍ സമിതികള്‍ രൂപീകരിച്ചത്. സ്ഥലം എം.എല്‍.എയോ എം.പിയോ ആവും ഇതിന്റെ മേധാവി. ആശുപത്രിയുടെ വികസനം, സൗകര്യം എന്നിവ പരിശോധിക്കലാണ് സമിതിയുടെ ചുതമല. പ്രതിവര്‍ഷം ഓരോസമിതിക്കും മൂന്നുലക്ഷം രൂപ ഗ്രാന്റ് ആയും ലഭിക്കുന്നുണ്ട്.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Comments are closed for this post.