2022 January 26 Wednesday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

മഹീന്ദ്ര ഥാര്‍ സൂപ്പര്‍ഹിറ്റ്; 18 ദിവസത്തിനുള്ളില്‍ ബുക്കിങ് 15000 കടന്നു

ലുക്കിലും ഫീച്ചറിലും സമാനതകളില്ലാതെ എത്തിയ മഹീന്ദ്രയുടെ പുതുതലമുറ ഥാര്‍ ഉത്പാദനം വര്‍ധിപ്പിക്കുമെന്ന് മഹീന്ദ്ര ആന്‍ഡ് മഹീന്ദ്ര പ്രഖ്യാപിച്ചു. 18 ദിവസത്തിനുള്ളില്‍ 15000 ത്തിലധികം ബുക്കിങുകള്‍ വാഹനം കരസ്ഥമാക്കിയതിനു പിന്നാലെയാണ് ഉത്പാദനം വര്‍ധിപ്പിക്കാനൊരുങ്ങുന്നത്.

2020 മഹീന്ദ്ര ഥാര്‍ ഉപഭോക്താക്കളില്‍ 57 ശതമാനം പേരും ആദ്യമായി ഥാര്‍ വാങ്ങുന്ന ഉടമകളാണെന്നും ബുക്കിംഗില്‍ വലിയൊരു ഭാഗം ഓട്ടോമാറ്റിക് വേരിയന്റുകള്‍ക്കാണെന്നും പ്രാദേശിക യുവി സ്പെഷ്യലിസ്റ്റ് പ്രസ്താവനയില്‍ പറഞ്ഞു. പെട്രോള്‍-ഡീസല്‍ മോഡലുകള്‍ക്ക് ബുക്കിങ്ങ് ഉണ്ടെങ്കിലും ട്രാന്‍സ്മിഷനില്‍ ഓട്ടോമാറ്റിക് മോഡലുകളോടാണ് ഉപയോക്താക്കള്‍ക്ക് ഏറെ പ്രിയം.

1.11 കോടി രൂപയ്ക്കാണ് ഥാറിന്റെ ആദ്യ യൂണിറ്റ് ഡല്‍ഹി സ്വദേശി സ്വന്തമാക്കിയത്. തുടര്‍ന്ന് വില പ്രഖ്യാപിച്ചതിന് പിന്നാലെ ബുക്കിങ്ങില്‍ വന്‍ കുതിപ്പാണ് ഉണ്ടായിരിക്കുന്നതെന്ന് മഹീന്ദ്ര അറിയിച്ചു.

രണ്ടാം തലമുറ മോഡലിലൂടെ മഹീന്ദ്ര വിജയകരമായി പ്രീമിയം സവിശേഷതകളും ഒരു അപ്പ് മാര്‍ക്കറ്റ് ക്യാബിനും ഉള്‍പ്പെടുത്തി ഥാര്‍ ഒരു ലൈഫ്‌സ്‌റ്റൈല്‍ എസ്യുവിയായി മാറ്റി.

പെട്രോള്‍-ഡീസല്‍ എന്‍ജിനുകളിലും ഓട്ടോമാറ്റിക്-മാനുവല്‍ ട്രാന്‍സ്മിഷനുകളിലുമായി എട്ട് വേരിയന്റിലെത്തുന്ന പുതുതലമുറ ഥാറിന് 9.80 ലക്ഷം മുതല്‍ 12.95 ലക്ഷംവരെയാണ് എക്‌സ്‌ഷോറും വില. എ.എക്‌സ്, എല്‍.എക്‌സ് എന്നീ രണ്ട് സീരീസിലാണ് ഥാര്‍ എത്തുന്നത്. ഇത് എ.എക്‌സ് അഡ്വഞ്ചര്‍ മോഡലും എല്‍.എക്‌സ് ലൈഫ് സ്റ്റൈല്‍ മോഡലുമായിരിക്കും.

2.0 ലിറ്റര്‍ എംസ്റ്റാലിന്‍ പെട്രോള്‍, 2.2 ലിറ്റര്‍ എംഹോക്ക് ഡീസല്‍ എന്‍ജിനുകളാണ് ഥാറില്‍ പ്രവര്‍ത്തിക്കുന്നത്. പെട്രോള്‍ എന്‍ജിന്‍ 150 ബിഎച്ച്പി പവറും 320 എന്‍എം ടോര്‍ക്കും, ഡീസല്‍ എന്‍ജിന്‍ 130 ബിഎച്ച്പി പവറും 300 എന്‍എം ടോര്‍ക്കുമേകും. മാനുവല്‍ ട്രാന്‍സ്മിഷനൊപ്പം എല്‍.എക്‌സ് വേരിയന്റില്‍ ആറ് സ്പീഡ് ഓട്ടോമാറ്റിക് ട്രാന്‍സ്മിഷനും നല്‍കും.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

Advt.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.