2023 March 26 Sunday
പോരാട്ടങ്ങളും യാതനകളും മനുഷ്യനെ പൂര്‍ണതയിലെത്തിക്കുന്നു. ഇന്ദിരാഗാന്ധി

ജി20 ഉച്ചകോടിക്ക് മുന്നോടിയായി കാശ്മീരിനെ പ്രത്യേക പ്രദേശമാക്കി സഊദി പുറത്തിറക്കിയ പുതിയ കറൻസി പിൻവലിച്ചു

വിഷയത്തിൽ ഇന്ത്യ സഊദിയെ പ്രതിഷേധം അറിയിച്ചിരുന്നു 

    ദുബൈ: ഏറെ വിവാദമായ പുതിയ കറൻസി സഊദി അറേബ്യ  പിൻവലിച്ചതായി റിപ്പോർട്ട്.  ജി20 ഉച്ചകോടിക്ക് ഇന്ന് വൈകിട്ട് തുടക്കം കുറിക്കാനിരിക്കെ ഇന്ത്യൻ അതിർത്തികളെ തെറ്റായി ചിത്രീകരിച്ച് പുറത്തിറക്കിയ പുതിയ കറൻസി സഊദി പൻവലിച്ചതായി ഇന്ത്യൻ മാധ്യമങ്ങൾ റിപ്പോർട്ട് ചെയ്തു. സഊദി അധ്യക്ഷതയിൽ നടക്കുന്ന ജി20 ഉച്ചകോടിയുടെ അടയാളമായി പുറത്തിറക്കിയ പുതിയ 20 റിയാൽ കറൻസികളിൽ നൽകിയ ഭൂപടത്തിലാണ് കാശ്മീരിനെ ഇന്ത്യയിൽ നിന്നും വേർപ്പെടുത്തിയിരുന്നത്. സംഭവത്തിൽ പ്രതിഷേധിച്ച ഇന്ത്യ കറൻസിയിലെ ഭൂപടത്തിലെ തെറ്റ് തിരുത്തണമെന്ന് ഇന്ത്യ റിയാദ് അംബാസഡർ വഴി ഔദ്യോഗികമായി ആവശ്യപ്പെട്ടിരുന്നതായും മാധ്യമങ്ങൾ റിപ്പോർട്ട് ചെയ്തു.

The global map printed on the 20 Riyal banknote, released to mark Saudi Arabia’s presidency of the G20 grouping, did not feature Jammu and Kashmir and Ladakh as part of India. (File Photo)

     ഇതേ തുടർന്ന് ഉച്ചകോടിക്ക് മുന്നോടിയായി കറൻസി പിൻവലിക്കുകയും പ്രിന്റിങ് നിർത്തിവയ്ക്കുകയും ചെയ്തതായാണു സൂചന. പുതിയതായി പുറത്തിറക്കിയ കറൻസിയുടെ ഒരു ഭാഗത്ത്‌ ഭരണാധികാരി സൽമാൻ രാജാവിന്റെയും ജി20 ഉച്ചകോടിയുടെ ലോഗോയും മറുഭാഗത്ത് ലോകഭൂപടവുമാണുള്ളത്. ഇതിലാണ് കശ്മീരിനെയുടെ ലഡാക്കിനെയും ഇന്ത്യയിൽനിന്ന് വേർതിരിച്ച് കാണിച്ചിരിക്കുന്നത്. നേരത്തെ, പാക്ക് അധിനിവേശ കശ്മീർ പാക്കിസ്ഥാന്റേതാണെന്ന മുൻനിലപാടും സഊദി തിരുത്തിയിരുന്നു.

     ഇന്ത്യൻ അതിർത്തികളെ തെറ്റായി ചിത്രീകരിക്കുന്ന കാര്യം ഞങ്ങൾ ഏറ്റെടുത്തിരുന്നുവെന്നും ന്യൂഡൽഹിയിലും റിയാദിലും ഇത് ചർച്ച ചെയ്തിരുന്നതായും ഇക്കാര്യത്തിൽ ഇന്ത്യയുടെ ആശങ്കകൾ അറിയിച്ചതായും ഇന്ത്യൻ വിദേശ കാര്യ മന്ത്രാലയ വക്താവ് അനുരാഗ് ശ്രീ വാസ്തവ കഴിഞ്ഞ ദിവസം അറിയിച്ചിരുന്നു.

    കൊവിഡിന്റെ പശ്ചാത്തലത്തിൽ ചേരുന്ന രണ്ട് ദിവസത്തെ ജി20 വിർച്വൽ ഉച്ചകോടിയിൽ  ലോക നേതാക്കൾക്കൊപ്പം പ്രധാനമന്ത്രി നരേന്ദ്ര മോദിയും പങ്കെടുക്കും. ഇന്ത്യൻ സമയം വൈകിട്ട് ആറരയ്ക്ക് സഊദി ഭരണാധികാരി സൽമാൻ രാജാവിന്റെ അധ്യക്ഷ പ്രസംഗത്തോടെ ഉച്ചകോടിക്ക് തുടക്കമാകും. തുടർന്നു മഹാമാരിക്കെതിരെയുള്ള തയാറെടുപ്പുകളും പ്രവർത്തനങ്ങളും എന്ന വിഷയത്തിൽ ചർച്ച നടക്കും.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Comments are closed for this post.