2024 February 25 Sunday
ബംഗാള്‍ ഉള്‍ക്കടലില്‍ ന്യൂനമര്‍ദ്ദം; സംസ്ഥാനത്ത് അടുത്ത അഞ്ച് ദിവസം മഴയ്ക്ക് സാധ്യത

സി.പി.എം.സമ്മർദം ; ഷാജഹാൻ കൊലക്കേസിൽ മലക്കം മറിഞ്ഞ് പൊലിസ് സംഭവം രാഷ്ട്രീയ വിരോധത്താലെന്ന്

സ്വന്തം ലേഖകൻ
പാലക്കാട് • സി.പി.എം ബ്രാഞ്ച് സെക്രട്ടറി ഷാജഹാൻ കൊലപ്പെടുത്തിയ കേസിൽ തങ്ങളുടെ ആദ്യ വാദത്തിൽ നിന്നും മലക്കം മറിഞ്ഞ് പൊലിസ്. വ്യക്തിവിരോധത്തെ തുടർന്നുള്ള കൊലപാതകമെന്ന് നേരത്തെ വിശദീകരിച്ച പൊലിസ്, ഒന്നു മുതൽ എട്ട് വരെയുള്ള പ്രതികൾ ബി.ജെ.പി അനുഭാവികളാണെന്നും രാഷ്ട്രീയ വിരോധത്താലാണ് ഷാജഹാനെ വെട്ടിക്കൊന്നതെന്നും കസ്റ്റഡി അപേക്ഷയിൽ പറയുന്നു.

കുന്നാങ്കാട് ബ്രാഞ്ച് സെക്രട്ടറി ഷാജഹാൻ്റെ പാർട്ടിയിലെ വളർച്ചയിൽ പ്രതികൾക്കുള്ള വിരോധമാണ് കൊലയ്ക്ക് കാരണമെന്നായിരുന്നു പാലക്കാട് ജില്ലാ പൊലിസ് മേധാവി നേരത്തെ നടത്തിയ വെളിപ്പെടുത്തൽ. ഷാജഹാൻ ബ്രാഞ്ച് സെക്രട്ടറി ആയതോടെ പ്രതികളുടെ ശത്രുത കടുത്തുവെന്നും പ്രാദേശികമായി ഉണ്ടായ ചില തർക്കങ്ങളാണ് പെട്ടന്നുള്ള കൊലയിൽ കലാശിച്ചതെന്നുമാണ് നേരത്തെ പൊലിസ് വ്യക്തമാക്കിയത്. രാഖി കെട്ടിയതിനെച്ചൊല്ലിയുള്ള തർക്കവും ഗണേശോത്സവത്തിന് പ്രതികൾ ഫ്‌ളക്‌സ് വയ്ക്കാൻ ശ്രമിച്ചതും ആണ് പെട്ടന്നുള്ള പ്രകോപനമെന്നും കേസിൽ അറസ്റ്റിലായവർക്കെല്ലാം ഷാജഹാനോടുള്ള പകയ്ക്ക് വെവ്വേറെ കാരണം ഉണ്ടെന്നും പൊലിസ് വിശദീകരിച്ചിരുന്നു.

എന്നാൽ കൊലപാതകത്തിന് കാരണം വ്യക്തി വിരോധമാണെന്ന് വരുത്തി തീർക്കാൻ ശ്രമം നടക്കുന്നതായും, അതിന് പിന്നിൽ ആരുടെയോ പ്രത്യേക അജൻഡയുണ്ടെന്നുമായിരുന്നു സി.പി.എം ആരോപണം. വ്യക്തിവിരോധത്തെ തുടർന്നുള്ള കൊലപാതകമെന്ന് പൊലിസ് പറഞ്ഞത് എന്തിന്റെ അടിസ്ഥാനത്തിലാണെന്ന് സി.പി.എം പാലക്കാട് ജില്ലാ സെക്രട്ടറി ഇ.എൻ സുരേഷ് ബാബു പരസ്യമായി തുറന്നടിച്ചിരുന്നു. ഇതിന് പിന്നാലെയാണ് പ്രതികളെല്ലാം ബി.ജെ.പി അനുഭാവികളെന്ന് പൊലിസ് കസ്റ്റഡി അപേക്ഷയിൽ വിശദീകരിക്കുന്നത്.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Comments are closed for this post.