2024 February 29 Thursday
രാജീവ് ഗാന്ധി വധക്കേസില്‍ ജയില്‍മോചിതനായ ശാന്തന്‍ മരിച്ചു

സി.പി.എം കാസർകോട് ജില്ലാസമ്മേളനം പൊലിസിനും പാർട്ടി നേതൃത്വത്തിനുമെതിരേ രൂക്ഷവിമർശനം

സ്വന്തം ലേഖകൻ
മടിക്കൈ (കാസർകോട്)
സി.പി.എം കാസർകോട് സമ്മേളനത്തിൽ പൊലിസിനും പാർട്ടി നേതൃത്വത്തിനുമെതിരേ രൂക്ഷവിമർശനം. പെരിയ ഇരട്ടക്കൊലക്കേസിലും കാഞ്ഞങ്ങാട്ടെ ഡി.വൈ.എഫ്.ഐ പ്രവർത്തകൻ ഔഫ് അബ്ദുറഹ്മാൻ വധക്കേസിലും പൊലിസ് ഇരട്ടത്താപ്പ് നയമാണ് കൈക്കൊണ്ടതെന്നും ഇതു തിരിച്ചറിയാനോ ഫലപ്രദമായി ഇടപെടാനോ പാർട്ടി നേതൃത്വത്തിനു കഴിഞ്ഞില്ലെന്നും ചർച്ചയിൽ പങ്കെടുത്തവർ വിമർശിച്ചു.
ഈ നടപടികൾ ജനങ്ങൾക്കിടയിൽ പാർട്ടിയെ അവമതിപ്പെടുത്താൻ ഇടയാക്കിയെന്നും വിമർശനം ഉയർന്നു. പൊലിസിന്റെ മിക്ക നടപടികളും പാർട്ടിയേയും ഭരണത്തേയും പ്രതികൂലമായി ബാധിക്കുകയാണെന്നും പ്രതിനിധികൾ ആരോപിച്ചു.
പൊലിസ് നേതൃത്വം ഇപ്പോഴും യു.ഡി.എഫ് നേതാക്കളുടെ നിയന്ത്രണത്തിലാണെന്നും അതുകൊണ്ടുതന്നെ പെരിയ കൊലക്കേസിലെ പ്രതികളെ ട്രാപ്പിലാക്കുകയായിരുന്നുവെന്നും സമ്മേളനത്തിലെ ചർച്ചയിൽ പ്രതിനിധി രൂക്ഷമായി വിമർശിച്ചു. പെരിയ കേസിൽ നേതൃത്വത്തിന്റെ ഭാഗത്തുനിന്നും ഗുരുതരമായ വീഴ്ചയാണ് ഉണ്ടായതെന്നും പ്രതിനിധി ആരോപിച്ചു.
ലോക്‌സഭാ
തെരഞ്ഞെടുപ്പ് പരാജയം;വിശദീകരണം
തൃപ്തികരമല്ലെന്നു പ്രതിനിധികൾ
മടിക്കൈ
ലോക്‌സഭാ തെരഞ്ഞെടുപ്പിൽ കാസർകോട് മണ്ഡലത്തിലെ എൽ.ഡി.എഫിന്റെ പരാജയം പ്രത്യേകസാഹചര്യത്തിൽ കേരളത്തിലാകെയുണ്ടായ മാറ്റമെന്ന നേതൃത്വത്തിന്റെ വിശദീകരണം തൃപ്തികരമല്ലമെന്നു ജില്ലാസമ്മേളന പ്രതിനിധികൾ.
40000 വോട്ടിന്റെ തോൽവി എങ്ങനെ സംഭവിച്ചുവെന്ന് പരിശോധിക്കണമെന്നും ചർച്ചയിൽ പരാമർശം ഉയർന്നു. ഹൈക്കോടതി ഉത്തരവിന്റെ അടിസ്ഥാനത്തിൽ മൂന്നുദിവസത്തെ സമ്മേളനം ഒരുദിവസമായി വെട്ടിച്ചുരുക്കിയതിനെ തുടർന്നു പ്രവർത്തന റിപ്പോർട്ടിന്മേലുള്ള ചർച്ചയിൽ പങ്കെടുക്കേണ്ടവരുടെ എണ്ണവും ചുരുക്കിയിരുന്നു. മറ്റു ചോദ്യങ്ങൾ എഴുതിനൽകാനും അവയ്ക്കുള്ള മറുപടി സർക്കുലർ വഴി കീഴ്ഘടകങ്ങളിലേക്ക് അയക്കാനുമാണു തീരുമാനം.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Comments are closed for this post.