2024 February 25 Sunday
ബംഗാള്‍ ഉള്‍ക്കടലില്‍ ന്യൂനമര്‍ദ്ദം; സംസ്ഥാനത്ത് അടുത്ത അഞ്ച് ദിവസം മഴയ്ക്ക് സാധ്യത

സഹകരണ മേഖലയിലെ ക്രമക്കേട് തടയാൻ ടീം ഓഡിറ്റ്

ബാസിത് ഹസൻ
തൊടുപുഴ • സഹകരണ മേഖലയിൽ ക്രമക്കേടുകൾ തടയാൻ ടീം ഓഡിറ്റ് സംവിധാനവുമായി സർക്കാർ.
കരുവന്നൂർ സഹ. ബാങ്ക് അഴിമതി വിവാദം സംസ്ഥാന രാഷ്ട്രീയത്തെ പിടിച്ചുലച്ച സാഹചര്യത്തിലാണ് തീരുമാനം. ടീം ഓഡിറ്റിലൂടെ സുതാര്യതയും നിഷ്പക്ഷതയും ഉറപ്പുവരുത്താൻ കഴിയുമെന്നാണ് വിലയിരുത്തൽ.

100 കോടി വരെ പ്രവർത്തന മൂലധനമുള്ള സഹകരണ സംഘങ്ങളിൽ സ്‌പെഷൽ ഗ്രേഡ് / സീനിയർ ഓഡിറ്റർമാരും 100 കോടിക്കും 500 കോടിക്കും ഇടയിൽ പ്രവർത്തന മൂലധനമുള്ള സംഘങ്ങളിൽ അസി. ഡയരക്ടർമാരുമായിരിക്കും ടീം ലീഡർമാർ.

ലീഡർ ഉൾപ്പെടെ മൂന്ന് ഓഡിറ്റർമാർ ടീമിലുണ്ടാകും. പ്രവർത്തന മൂലധനത്തിന്റെ അടിസ്ഥാനത്തിൽ ടീം രൂപീകരിച്ച് ഓരോ ബാങ്കിന്റെയും കണക്കുകൾ പരിശോധിക്കാൻ ചുമതല നൽകും. മേൽനോട്ടം ജില്ലാതല ജോയിന്റ് ഡയരക്ടർമാർക്കായിരിക്കും. ഓഡിറ്റ് റിപ്പോർട്ടിനൊപ്പം വിശദമായ ചോദ്യാവലിയും പൂരിപ്പിച്ച് നൽകേണ്ടതുണ്ട്.
ടീം ഓഡിറ്റിന്റെ പൈലറ്റ് പദ്ധതിക്ക് പത്തനംതിട്ട ജില്ലയിൽ തുടക്കമായിട്ടുണ്ട്. സ്‌പെഷൽ ഗ്രേഡ് ഓഡിറ്റർമാർ ടീം ലീഡറായി 14 ടീമുകളും കോഴഞ്ചേരി, അടൂർ, റാന്നി എന്നിവിടങ്ങളിൽ അസി. ഡയരക്ടർമാർ ടീം ലീഡറായി മൂന്ന് ടീമുകളുമായിട്ടാണ് പൈലറ്റ് പദ്ധതി രൂപീകരിച്ചിരിക്കുന്നത്.

   

നിലവിൽ വലിയ ബിസിനസ് വിറ്റുവരവും ജില്ല മുഴുവൻ പ്രവർത്തന പരിധിയുമുള്ള സംഘങ്ങളിൽ പോലും യൂനിറ്റ് ഓഡിറ്റ് സംവിധാനമാണ് നിലനിൽക്കുന്നത്. ജൂനിയർ ഓഡിറ്റർമാരെയാണ് പലപ്പോഴും ഇവിടെ നിയോഗിക്കുന്നത്. ഒരു യൂനിറ്റ് ഓഡിറ്റർ ഒരു മാസം തന്നെ നാല് ഓഡിറ്റ് റിപ്പോർട്ടുകൾ അസി. ഡയരക്ടർക്ക് സമർപ്പിക്കേണ്ടതായി വരും. ഇത് ഓഡിറ്റിങ് വഴിപാടാക്കുന്നുണ്ട്. ശരാശരി 2 ശാഖകളുള്ള ഒരു സംഘത്തിൽ 300 – 400 വൗച്ചറുകൾ ഒരുദിവസം ഉണ്ടാകും. ഒരു മാസത്തെ വൗച്ചർ ഒരു ദിവസം കൊണ്ട് നോക്കി തീരാൻ നിർബന്ധിതരാകുന്ന ഓഡിറ്റർ പരിശോധന പ്രഹസനമാക്കുകയും ചെയ്യും.

ക്രമക്കേട് കണ്ടെത്തിയാൽ തന്നെ രാഷ്ട്രീയ നേതൃത്വം ഇടപെട്ട് നടപടി അവസാനിപ്പിക്കുന്ന പ്രവണതയാണ് കാണുന്നത്. നിലവിലെ ഓഡിറ്റ് സംവിധാനം പൂർണ സ്വതന്ത്ര സംവിധാനമായി ശക്തിപ്പെടുത്തുകയാണ് ടീം ഓഡിറ്റിന്റെ മുഖ്യലക്ഷ്യം.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Comments are closed for this post.