2022 November 30 Wednesday
ലോകത്തില്‍ മാറ്റങ്ങള്‍ വരണമെന്ന് ഏവരും ആഗ്രഹിക്കുന്നു. എന്നാല്‍ സ്വയം മാറ്റത്തിനു വിധേയനവാന്‍ ആരും തയ്യാറല്ല താനും. ലിയോ ടോള്‍സ്റ്റോയ്

സഞ്ജു തിളങ്ങി, പക്ഷേ…

ദക്ഷിണാഫ്രിക്കക്കെതിരേ ഇന്ത്യക്ക് പരാജയം
സഞ്ജുവിനും അയ്യരിനും അർധ സെഞ്ചുറി
ലക്‌നൗ • മലയാളി താരം സഞ്ജു സാംസൺ തകർപ്പൻ പ്രകടനം കാഴ്ചവച്ച ദക്ഷിണാഫ്രിക്കക്കെതിരായ ആദ്യ ഏകദിന മത്സരത്തിൽ ഇന്ത്യക്ക് ഒമ്പത് റൺസിന്റെ പരാജയം. മഴയെ തുടർന്ന് 40 ഓവറാക്കി ചുരുക്കിയ മത്സരത്തിൽ ദക്ഷിണാഫ്രിക്ക നാലു വിക്കറ്റ് നഷ്ടത്തിൽ 249 റൺസെടുത്തപ്പോൾ മറുപടിക്കിറങ്ങിയ ഇന്ത്യയുടെ പോരാട്ടം ഒമ്പത് റൺസിനിപ്പുറം അവസാനിച്ചു. ഇന്ത്യ എട്ടു വിക്കറ്റിന് 240 റൺസെടുത്തു. അവസാന ഓവർ വരെ പൊരുതിയ സഞ്ജു 63 പന്തിൽ 86 റൺസെടുത്ത് ഇന്ത്യയുടെ നെടുംതൂണായി.
ശ്രേയസ് അയ്യരാണ് (37 പന്തിൽ 50) അർധ സെഞ്ചുറി കുറിച്ച മറ്റൊരു താരം. ഷാർദുൽ താക്കൂറും (31 പന്തിൽ 33) തിളങ്ങി. മൂന്ന് സിക്‌സും ഒമ്പത് ഫോറും ഉൾപ്പെടുന്നതാണ് സഞ്ജുവിന്റെ ബാറ്റിങ്. ദക്ഷിണാഫ്രിക്കൻ നിരയിൽ ഡേവിഡ് മില്ലർ (63 പന്തിൽ പുറത്താവാതെ 75), ഹെൻറിച്ച് ക്ലാസൻ (65 പന്തിൽ പുറത്താവാതെ 74), ക്വിന്റൺ ഡി കോക്ക് (54 പന്തിൽ 48) തിളങ്ങി.

40 ഓവറിൽ 250 റൺസ് വിജയലക്ഷ്യവുമായി ഇറങ്ങിയ ഇന്ത്യ തുടക്കത്തിൽ തന്നെ പതർച്ച നേരിട്ടു. എട്ടു റൺസ് ചേർക്കുന്നതിനിടെ ഓപണർമാരായ ശിഖർ ധവാനെയും ശുഭ്മാൻ ഗില്ലിനെയും നഷ്ടമായി. പിന്നീട് ഒത്തുചേർന്ന ഇഷൻ കിഷനും (37 പന്തിൽ 20) ഋതുരാജ് ഗെയ്ക്‌വാദും (42 പന്തിൽ 19) സൂക്ഷ്മതയോടെ കളിച്ച് ഇന്ത്യയെ കരകയറ്റാൻ ശ്രമിച്ചെങ്കിലും പദ്ധതി വിജയിച്ചില്ല. തുടർന്ന് ഒരുമിച്ച മലയാളി താരം സഞ്ജു സാംസണും ഷാർദുൽ താക്കൂറുമാണ് ഇന്ത്യയെ മുന്നോട്ട് നയിച്ചത്.
പക്ഷേ, അവസാന ഓവറുകളിൽ ഷാർദുൽ വീണതോടെ സഞ്ജുവിന് ഒറ്റയ്ക്ക് ഇന്ത്യയെ ജയത്തിലെത്തിക്കാൻ കഴിഞ്ഞില്ല.

ടോസ് നഷ്ടപ്പെട്ട് ബാറ്റിങ്ങിനയക്കപ്പെട്ട ദക്ഷിണാഫ്രിക്കയ്ക്ക് ഓപണർമാരായ ജന്നിമാൻ മലാനും ക്വിന്റൺ ഡി കോക്കും ചേർന്ന് ഭേദപ്പെട്ട തുടക്കമാണ് നൽകിയത്.
ഇരുവരും ബൗളർമാരെ ശ്രദ്ധയോടെ നേരിട്ടതോടെ ആദ്യ വിക്കറ്റിൽ വീണത് 49 റൺസ്. 13ാം ഓവറിൽ മലാനെ(22) ശ്രേയസ് അയ്യരുടെ കൈകളിലെത്തിച്ച് താക്കൂർ ആദ്യ വിക്കറ്റ് വീഴ്ത്തി.
തുടർന്നെത്തിയ നായകൻ ടെംബ ബാവുമ(8) ഇപ്രാവശ്യവും നിറംമങ്ങി. ഇത്തവണ താരത്തെ താക്കൂർ സ്റ്റംപെടുത്തു വീഴ്ത്തി. പിന്നാലെ മാർക്രം പൂജ്യനായും മടങ്ങിയതോടെ ദക്ഷിണാഫ്രിക്ക 16 ഓവറിൽ 71 എന്ന നിലയിലേക്ക് കൂപ്പുകുത്തി.
തുടർന്ന് ഒരുമിച്ച ഡി കോക്കും ക്ലാസനും ചേർന്നാണ് ടീമിനെ കരകയറ്റിയത്. ഡി കോക്ക് മടങ്ങിയതോടെ അപരാജിത കൂട്ടുകെട്ടുമായി ക്ലാസനും മില്ലറും അടിച്ചു തകർത്തതോടെ ദക്ഷിണാഫ്രിക്ക നാലോവറിൽ 249 റൺസിൽ പാഡഴിച്ചു.
ഷാർദുൽ താക്കൂർ രണ്ടും രവി ബിഷ്‌നോയ്, കുൽദീപ് യാദവ് എന്നിവർ ഓരോ വിക്കറ്റും വീഴ്ത്തി.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

Advt.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Comments are closed for this post.