ജിദ്ദ: സഊദി രാജ്യാന്തര സൈക്ലിങ്​​ മത്സര പരിപാടിക്ക്​ തുടക്കം കുറിക്കുന്നു. തലസ്ഥാന നഗരമായ റിയാദാണ്​​ ആദ്യ തവണ ആതിഥേയത്വം വഹിക്കുകയെന്നും സഊദി ജനറൽ സ്​പോർട്​സ്​ അതോറിറ്റി ചെയർമാൻ അമീർ അബ്​ദുൽ അസീസ്​ ബിൻ തുർക്കി അൽഫൈസൽ അറിയിച്ചു.

അഞ്ച്​ ഘട്ടങ്ങളായി മത്സരം ഫെബ്രുവരി നാല്​ മുതൽ എട്ട്​ വരെയാ​ണെന്നും മത്സരങ്ങൾ. ഫ്രാൻസിലെ പ്രശസ്​ത സൈക്ലിങ്​​ മത്സരം ‘ടൂർ ഡെ ഫ്രാൻസി’ന്‍റെ സംഘാടകരായ അമാരി സ്​പോർട്​ ഓർഗനൈസേഷൻ (എ.എസ്​.ഒ) ആണ്​ ഉദ്ഘാടന പതിപ്പായ 2.1 കാറ്റഗറി മത്സരം അവതരിപ്പിക്കുന്നത്​. റിയാദ്​ നഗരത്തെ വലം വെക്കും വിധം ട്രാക്കൊരുക്കിയാണ്​ മത്സരം.

റിയാദ്​ ഡിജിറ്റൽ സിറ്റിയിൽ നടത്തിയ വാർത്താസമ്മേളനത്തിൽ മത്സരത്തി​ന്‍റെ റൂട്ട്​ സംബന്ധിച്ച വിശദാംശങ്ങൾ പുറത്തുവിട്ടു. അമാരി സ്​പോർട്​ ഓർഗനൈസേഷൻ ഇതേ രീതിയിൽ ഒമാനിലും ‘ടൂർ ഓഫ്​ ഒമാൻ’ സൈക്ലിങ്​​ മത്സരം പ്രഖ്യാപിച്ചിരുന്നു. അതിന്​ മുമ്പായി​ സഊദിയിൽ മത്സരം പൂർത്തിയാക്കാനായിരുന്നു​ തീരുമാനവും. എന്നാൽ ഫെബ്രുവരി 11 മുതൽ 16 വരെ ഒമാനി​ൽ നിശ്ചയിച്ച മത്സരം സുൽത്താൻ ഖാബൂസിന്‍റെ വിയോഗത്തെ തുടർന്ന്​ റദ്ദാക്കി​.

മധ്യപൗരസ്​ത്യ ദേശത്ത്​ സൈക്ലിങ്ങിന്​ ഒരു പുതിയ മേഖലയെ സൃഷ്​ടിച്ചെടുക്കുക എന്ന ദൗത്യത്തിലാണ്​ തങ്ങളെന്നും ഈ വർഷം അതിന്​ തുടക്കം കുറിക്കുമെന്നും എ.എസ്​.ഒ ചീഫ്​ എക്​സിക്യുട്ടീവ്​ യാൻ ലെ മോയനർ പറഞ്ഞു. സഊദി അറേബ്യയിൽ ഇതിനും തുടക്കം കുറിക്കും. സൈക്ലിങ്ങിന്‍റേതായ ഒരു അന്തരീക്ഷം സഊദി വ്യാപകമായി വളർത്തിയെടുക്കും. മറ്റ്​ രാജ്യങ്ങളിലേക്കും ഇത്​ വ്യാപിപ്പിക്കും. മത്സരം വാർഷിക കലണ്ടറി​ന്‍റെ ഭാഗമാക്കുമെന്നും അദ്ദേഹം കൂട്ടിച്ചേർത്തു.

സഊദി അറേബ്യയ്​ക്ക്​ ഇതൊരു ആദരമാണെന്നും ആഭ്യന്തര വിനോദ സഞ്ചാരമേഖലയുടെ പ്രോത്സാഹനത്തിന്​ രാജ്യാന്തര സൈക്ലിങ്​ മത്സരം സഹായകമാകുമെന്നും സഊദി സൈക്ലിങ്​ ഫെഡറേഷൻ ചീഫ്​ സബാഹ്​ അൽഖറൈദീസ്​ പറഞ്ഞു.