2020 September 29 Tuesday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

വിഴിഞ്ഞത്ത് സുരക്ഷാ ഏജന്‍സികളെ വട്ടംചുറ്റിച്ച് മത്സ്യത്തൊഴിലാളി

വിഴിഞ്ഞം: കളര്‍തുണി ഉപയോഗിച്ച് പായ കെട്ടി കാറ്റിന്റെ ഗതിക്കൊത്ത് കട്ടമരത്തില്‍ സഞ്ചരിച്ച മത്സ്യത്തൊഴിലാളി വിഴിഞ്ഞത്തെ തീര സുരക്ഷാ ഏജന്‍സികളെ വട്ടം ചുറ്റിച്ചു. 78 കാരനായ പൂവാര്‍ വര വിളത്തോപ്പ് പുരയിടത്തില്‍ ക്ലമന്‍സ് ആണ് അധികൃതരെ ഏറെ നേരം വട്ടം കറക്കിയത്. ഉച്ചയോടെ കടലില്‍ വി.എസ്.എസ്.സി ഭാഗത്തേക്ക് ഒരു പായ്ക്കപ്പല്‍ വരുന്നതായ സന്ദേശം ലഭിച്ചതോടെ തീര സുരക്ഷാ സേനാവിഭാഗങ്ങള്‍ പരക്കം പാഞ്ഞു.
തെരച്ചിലിനൊടുവില്‍ വിഴിഞ്ഞം തീരസംരക്ഷണസേനയുടെ കപ്പല്‍ കടലില്‍ ഒഴുകി നടന്ന കട്ടമരം കണ്ടെത്തി കസ്റ്റഡിയിലെടുത്തു. തുടര്‍ന്ന് വിലക്കു വാങ്ങിയ കട്ട മരത്തില്‍ സഞ്ചരിച്ച ക്ലമന്‍സാണ് തങ്ങളെ ഏറെ നേരം വട്ടം ചുറ്റിച്ചതെന്ന് സേനക്ക് മനസിലായി.
മകളുടെ വീട് സ്ഥിതി ചെയ്യുന്ന അഞ്ചുതെങ്ങില്‍ നിന്ന് വിലക്ക് വാങ്ങിയ കട്ട മരം പുത്തന്‍ തോപ്പിലെ കടലില്‍ ഇറക്കിയ ക്ലമന്‍സ് കാറ്റിന്റെ സഹായത്താല്‍ എളുപ്പം ലക്ഷ്യസ്ഥാനത്ത് എത്താന്‍ വേണ്ടി കളര്‍തുണികൊണ്ട് പായ്‌കെട്ടി സഞ്ചാരിക്കുകയായിരുന്നു.
ശക്തമായ കാറ്റിനെ തുടര്‍ന്ന് ലക്ഷ്യം തെറ്റിയ കട്ടമരം ഇന്നലെ ഉച്ചയോടെ തുമ്പഭാഗത്തെ കടലില്‍ കുറച്ച് നേരം ഒഴുകി നടന്നു. ഈ സമയത്താണ് വര്‍ണ്ണനിറത്തില്‍ അലങ്കരിച്ച അജ്ഞാത വസ്തു തീരത്തേക്ക് അടുക്കുന്നതായ വിവരം വിഴിഞ്ഞത്തെ തീരസംരക്ഷണസേനക്കും തീരദേശ പൊലിസിനും ലഭിച്ചത്.
ശ്രീലങ്കയിലെ ഭീകരാക്രമണത്തിനെ തുടര്‍ന്ന് ശക്തമായ ജാഗ്രത നിര്‍ദേശം ലഭിച്ചിരുന്നു.
ഇതിന്റെ ഭാഗമായി കടല്‍നിരീക്ഷണം ശക്തമാക്കിയതിനിടയിലാണ് തന്ത്രപ്രധാന ഭാഗം ലക്ഷ്യമാക്കി അജ്ഞാത വസ്തുവിന്റെ വരവെന്ന സന്ദേശം ലഭിക്കുന്നത്. ഇതോടെ തീരസംരക്ഷണസേനയുടെ കപ്പല്‍ ലക്ഷ്യസ്ഥാനത്തേക്ക് പാഞ്ഞു.
തുടര്‍ന്ന് കട്ടമരത്തില്‍ തുഴഞ്ഞു വരുന്ന ക്ലമന്‍സിനെ പിടികൂടി ചോദ്യം ചെയ്തശേഷം കട്ട മരവും കപ്പലില്‍ കയറ്റി വിഴിഞ്ഞം തുറമുഖത്ത് എത്തിച്ചു. വൈദ്യ പരിശോധന നടത്തി ആരോഗ്യവാനെന്ന് ഉറപ്പു വരുത്തിയ ശേഷം വൈകുന്നേരത്തോടെ ഇയാളെ തീരദേശ പൊലിസിന് കൈമാറി.
ബന്ധുക്കളെ വിളിച്ച് വരുത്തിയ തീരദേശ പൊലിസ് രേഖാമൂലമുള്ള നടപടികള്‍ക്ക് ശേഷം കളമന്‍സിനെ ബന്ധുക്കള്‍ക്കൊപ്പം വിട്ടയച്ചു.

Advt.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.