2020 October 24 Saturday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

വാഗമണ്‍ തങ്ങള്‍പാറ ആണ്ടുനേര്‍ച്ച 27ന്

കോട്ടയം: വാഗമണ്‍ കോലാഹലമേട് തങ്ങള്‍പാറയിലെ ശൈഖ് ഫരീദുദ്ദീന്‍ വലിയുല്ലാഹിയുടെ ആണ്ടുനേര്‍ച്ച 27 ,28 ദിവസങ്ങളില്‍ നടക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. ശനിയാഴ്ച രാവിലെ 9.30ന് ഏന്തയാര്‍ ബദരിയ്യ മുസ്‌ലിം ജമാഅത്ത് പ്രസിഡന്റ് പി.വൈ അബ്ദുല്‍ ലത്തീഫ് പതാകയുയര്‍ത്തും. തുടര്‍ന്ന് വിവിധ പ്രാര്‍ഥനാചടങ്ങുകള്‍ നടക്കും. ഞായറാഴ്ച രാവിലെ 10ന് നടക്കുന്ന സാംസ്‌ക്കാരികസമ്മേളനം മന്ത്രി എം.എം മണി ഉദ്ഘാടനം ചെയ്യും. എം.പിമാരായ ആന്റോ ആന്റണി, ജോയിസ് ജോര്‍ജ്, എം.എല്‍.എമാരായ പി.സി ജോര്‍ജ്, ഇ.എസ് ബിജിമോള്‍ വഖഫ് ബോര്‍ഡ് മെമ്പര്‍ അഡ്വ.എം.ഷറഫുദ്ദീന്‍ തലശ്ശേരി,കൂട്ടിക്കല്‍ ഗ്രാമപഞ്ചായത്ത് പ്രസിഡന്റ്.ജസ്സി ജോസ്, ജില്ലാ പഞ്ചായത്ത് മെമ്പര്‍ കെ.രാജേഷ്, ബ്ലോക്ക് പഞ്ചായത്ത് മെമ്പര്‍ ശുഭേഷ് സുധാകരന്‍ എന്നിവര്‍ പങ്കെടുക്കും.  ചടങ്ങുകള്‍ക്ക് കൊല്ലം ചിന്നക്കട സെന്‍ട്രല്‍ ജുമാമസ്ജിദ് ചീഫ് ഇമാം അബ്ദുല്‍ വഹാബ് നേതൃത്വം നല്‍കും. ഉച്ചക്ക് 12ന് അന്നദാനം നടക്കും. കേരളത്തില്‍നിന്നും തമിഴ്‌നാട്ടില്‍നിന്നുമായി ആയിരങ്ങള്‍ പ്രാര്‍ഥനകള്‍ക്കും നേര്‍ച്ചകള്‍ക്കുമായി തങ്ങള്‍ പാറയിലെത്തുമെന്നും ഇവര്‍ പറഞ്ഞു. സ്വലാത്ത് മജ്‌ലിസ്, മൗലിദ് പാരായണം, ദിഖ്‌റ ഹല്‍വ, ദു:ആ.മജ്‌ലിസ് എന്നിവയും ഇതിന്റെ ഭാഗമായി നടക്കും. ആണ്ടു നേര്‍ച്ചക്ക് പുറമേ മറ്റ് ദിവസങ്ങളിലും നിരവധി വിശ്വാസികള്‍ ഇവിടെ എത്താറുണ്ടെന്നും ഇവര്‍ പറഞ്ഞു.
മഖ്ബറയില്‍ എത്താനുള്ള എളുപ്പവഴി ഏന്തയാര്‍-വല്യേന്ത-കോലാഹലമേട് റോഡാണ്.ഈ റോഡിന്റെ പണി പുരോഗമിച്ചു വരുന്നു. മുണ്ടക്കയം ഭാഗത്തുനിന്നും കിഴക്കന്‍ മേഖലയില്‍ നിന്നും വരുന്നവര്‍ക്ക് ഏലപ്പാറ വഴി കോലാഹലമേട്ടിലെത്താം. മറ്റുള്ളവര്‍ക്ക് ഈരാറ്റുപേട്ട-വാഗമണ്‍ വഴി കോലാഹലമേട്ടിലെത്താം. ഏന്തയാര്‍ ബദരിയ്യ മുസ്‌ലിം ജമാഅത്തിന്റെ നേതൃത്വത്തിലുള്ള മഖാം പരിപാലന സമിതിയാണ് നേതൃത്വം നല്‍കുന്നത്. പ്രസിഡന്റ് അബ്ദുല്‍ ലത്തീഫ് പണിക്കവീട്ടില്‍, സെക്രട്ടറി സി.എച്ച്. അഷറഫ് ചാന്തയില്‍, പി.പി ഖാലിദ് സഖാഫി, ഏന്തയാര്‍ റഹ്മാന്‍, അബ്ദു ആലസംപാട്ടില്‍ എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.

 

Advt.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.