2021 October 16 Saturday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

വകുപ്പ് മന്ത്രിയുടെ മണ്ഡലത്തിലടക്കം 42 സര്‍ക്കാര്‍ കോളജുകളില്‍ നാഥനില്ല

 

മലപ്പുറം: ഉന്നത വിദ്യാഭ്യാസ മന്ത്രി ഡോ.കെ.ടി ജലീലിന്റെ മണ്ഡലത്തില്‍ ഉള്‍പ്പെടെ സംസ്ഥാനത്ത് 42 സര്‍ക്കാര്‍ കോളജുകള്‍ക്ക് വര്‍ഷങ്ങളായി നാഥനില്ല. നിലവിലുള്ള ആധ്യാപകര്‍ക്ക് യു.ജി.സി നിഷ്‌ക്കര്‍ഷിച്ച യോഗ്യത കുറവുള്ളതിനാലാണ് പ്രിന്‍സിപ്പല്‍ തസ്തിക ഒഴിഞ്ഞു കിടക്കുന്നത്. പ്രിന്‍സിപ്പല്‍ ഇല്ലാത്ത കോളജുകളില്‍ മുതിര്‍ന്ന അധ്യാപകര്‍ക്ക് താല്‍ക്കാലിക ചുമതല നല്‍കിയിരിക്കുകയാണ്. എന്നാല്‍ പതിവ് ക്ലാസുകള്‍ക്ക് പുറമെ പ്രിന്‍സിപ്പല്‍ ചുമതല കൂടി വഹിക്കാന്‍ അധ്യാപകര്‍ മടിക്കുകയാണ്.

പ്രിന്‍സിപ്പല്‍ തസ്തിക ഒഴിഞ്ഞു കിടക്കുന്ന 32 കോളജുകളും മലബാറിലാണ്. കോഴിക്കോട് ജില്ലയില്‍ ഒന്‍പത് സര്‍ക്കാര്‍ കോളജുകളിലാണ് പ്രിന്‍സിപ്പലില്ലാത്തത്. ഉന്നത വിദ്യാഭ്യാസ മന്ത്രി ഡോ.കെ.ടി ജലീലിന്റെ മണ്ഡലത്തിലെ തവനൂര്‍ കോളജ് ഉള്‍പ്പടെ മലപ്പുറത്ത് എട്ടിടങ്ങളിലും നാഥനില്ല. പാലക്കാട് ഏഴ്, കാസര്‍ക്കോട് നാല്, തൃശൂര്‍ മൂന്ന്, കണ്ണൂര്‍, വയനാട്, എറണാകുളം, ഇടുക്കി, ആലപ്പുഴ ജില്ലകളില്‍ രണ്ടു കോളജുകളിലും , കോട്ടയത്ത് ഒരു പ്രിന്‍സിപ്പല്‍ തസ്തികയുമാണ് ഒഴിഞ്ഞു കിടക്കുന്നത്.

15 വര്‍ഷം സര്‍വിസ്, പിഎച്ച്.ഡി, അസോസിയേറ്റ് പ്രൊഫസര്‍, യു.ജി.സി മാനദണ്ഡം അനുസരിച്ച് 110 റിസര്‍ച് സ്‌കോര്‍, യു.ജി.സി അംഗീകരിച്ച 10 റിസര്‍ച് പബ്ലിക്കേഷനുമുള്ളവരെയാണ് പ്രിന്‍സിപ്പല്‍ യോഗ്യതയായി കണക്കാക്കുന്നത്. എയ്ഡഡ് കോളജുകളിലും ഇതേ യോഗ്യതയാണ് കണക്കാക്കുന്നത്. യോഗ്യതയുള്ളവര്‍ കുറഞ്ഞതിനാല്‍ അസോയിയേറ്റ് പ്രൊഫസറും 15 വര്‍ഷം സര്‍വിസും പിഎച്ച്.ഡിയുമുള്ളവരുടെ സീനിയോരിറ്റി പ്രകാരം നിയമിക്കാന്‍ ശ്രമിച്ചിരുന്നു. എന്നാല്‍ ഇതിനെതിരേ അധ്യാപകര്‍ തന്നെ രംഗത്തുവന്നതോടെ ഉപേക്ഷിക്കുകയായിരുന്നു.

 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

Advt.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.