2021 October 26 Tuesday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

ലക്ഷദ്വീപില്‍ ഗാന്ധിജയന്തി ആഘോഷത്തിന് 1.39 കോടി

 

ജലീല്‍ അരൂക്കുറ്റി

കവരത്തി: ജനകീയ പ്രതിഷേധം ശക്തമായ ലക്ഷദ്വീപില്‍ ഗാന്ധിജയന്തി ആഘോഷം കൊഴുപ്പിക്കാന്‍ അഡ്മിനിസ്‌ട്രേഷന്‍ ഗുജറാത്തിലെ ഇവന്റ് മാനേജ്‌മെന്റ് കമ്പനിയെ ചുമതലപ്പെടുത്തുന്നത് 1.39 കോടി രൂപയ്ക്ക്.

അഡ്മിനിസ്‌ട്രേറ്റര്‍ പ്രഫുല്‍ ഖോഡ പട്ടേലിന്റെ ഭരണ പരിഷ്‌കാരങ്ങള്‍ക്കെതിരേ ഒറ്റക്കെട്ടായി നിലകൊള്ളുന്ന ലക്ഷദ്വീപ് ജനതയെ ആകര്‍ഷിക്കാനും ദ്വീപ് ഭരണകൂടത്തിനെതിരേ ഉയര്‍ന്ന മോശം പ്രതിച്ഛായ മാറ്റിയെടുക്കുന്നതിനുമുള്ള അവസരമായിട്ടാണ് ഗാന്ധിജയന്തി ആഘോഷിക്കാന്‍ തീരുമാനിച്ചിരിക്കുന്നത്. ചെലവ് ചുരുക്കുന്നതിന്റെ ഭാഗമായി താല്‍ക്കാലിക ജീവനക്കാരെ പിരിച്ചുവിട്ടും ഡയറിഫാമുകള്‍ അടച്ചുപൂട്ടിയും സ്‌കൂളുകളും അങ്കണവാടികളും ലയിപ്പിച്ചും ഓഫിസുകള്‍ നിര്‍ത്തലാക്കിയും ഭരണപരിഷ്‌കാരം തുടരുമ്പോഴാണ് മറുവശത്ത് കോടികള്‍ ചെലവഴിച്ചു ഗാന്ധിജയന്തി ആഘോഷം.

പ്രമുഖ കലാകാരന്മാരെയും കേന്ദ്രമന്ത്രിമാരെയും ദ്വീപിലേക്ക് കൊണ്ടുവന്ന് പരിപാടി ആകര്‍ഷണീയമാക്കാനാണ് നീക്കം.
സ്മാര്‍ട്ട് സിറ്റി പദ്ധതിയുടെ ഫണ്ടില്‍ നിന്നാണ് ധൂര്‍ത്തിന് പണം ചെലവഴിക്കുന്നതെന്ന ആക്ഷേപവും ശക്തമാണ്. കുറഞ്ഞ തുക സമര്‍പ്പിച്ച കൊച്ചിയിലെ ടെന്‍ഡറുകള്‍ തള്ളിയാണ് പട്ടേലിന്റെ സ്വന്തം നാട്ടിലെ കമ്പനിക്ക് പരിപാടി കൈമാറുന്നത്.

അഹമ്മദാബാദ് കേന്ദ്രീകരിച്ചു പ്രവര്‍ത്തിക്കുന്ന ഗോബനാസ് ഇവന്റ് മാനേജ് കമ്പനിയെ 1,39,00,578 രൂപയ്ക്കാണ് തെരഞ്ഞെടുത്തിരിക്കുന്നത്. ടെന്‍ഡറില്‍ കുറഞ്ഞ തുകയായ 97,25,607 രൂപ സമര്‍പ്പിച്ച കൊച്ചി കേന്ദ്രമായ ഐസ് ക്യൂബ് ഇവന്റ് മാനേജ്‌മെന്റ് കമ്പനിയേയും 1,09,62,200 രൂപ സമര്‍പ്പിച്ച ഡല്‍ഹി കേന്ദ്രമായ ജെ.ബി.ഡികോര്‍ കമ്പനിയെയും തള്ളികൊണ്ടാണ് കൂടിയ തുക സമര്‍പ്പിച്ച ഗുജറാത്ത് കമ്പനിയെ തെരഞ്ഞെടുത്തത്. ടെക്‌നിക്കല്‍ സ്‌കോറിലും ഫിനാന്‍ഷ്യല്‍ സ്‌കോറിലും കൂടുതല്‍ യോഗ്യതാ മാര്‍ക്ക് നല്‍കിയാണ് ഗോബനാസിനെ തെരഞ്ഞെടുത്തത്. പട്ടേല്‍ അഡ്മിനിസ്‌ട്രേറ്ററായിരിക്കുന്ന ദാമന്‍ ദ്യൂവില്‍ പരിപാടി സംഘടിപ്പിച്ചത് ഇതേ ഗുജറാത്തി കമ്പനിയാണ്. ഇതുകൂടി പരിഗണിച്ചാണ് ഇവരെ തെരഞ്ഞെടുത്തത്.
മ്യൂസിക്, സൗണ്ട് സിസ്റ്റങ്ങള്‍ ഉള്‍പ്പെടെ വന്‍കരയില്‍ നിന്ന് എത്തിച്ചാണ് ദ്വീപില്‍ മെഗാമേളകള്‍ സംഘടിപ്പിക്കുന്നത്.
ലക്ഷദ്വീപിലെ രാഷ്ട്രീയ കക്ഷികളുടെ പൊതുകൂട്ടായ്മയായ സേവ് ലക്ഷദ്വീപ് ഫോറം അഡ്മിനിസ്‌ട്രേഷന്റെ പരിപാടിയോട് നിസഹകരണം പ്രഖ്യാപിക്കാനും പഞ്ചായത്തുകളുടെ നേതൃത്വത്തില്‍ ഗാന്ധി ജയന്തി ആഘോഷം നടത്താനുമാണ് തിരുമാനിച്ചിരിക്കുന്നത്.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

Advt.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.