2022 May 23 Monday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

മൗറീഞ്ഞോ യുനൈറ്റഡ് പരിശീലകന്‍

ലണ്ടന്‍: മുന്‍ ചെല്‍സി കോച്ച് ഹോസെ മൗറീഞ്ഞോയെ മാഞ്ചസ്റ്റര്‍ യുനൈറ്റഡ് കോച്ചായി നിയമിച്ചു. ക്ലബ് ഔദ്യോഗിക വെബ്‌സൈറ്റിലൂടെയാണ് ഇക്കാര്യം സ്ഥിരീകരിച്ചത്. ലൂയിസ് വാന്‍ ഗാലിന് പകരക്കാരനായാണ് മൗറീഞ്ഞോ യുനൈറ്റഡിലെത്തുന്നത്. മൂന്നു വര്‍ഷത്തെ കരാറിലാണ് മൗറീഞ്ഞോയുടെ നിയമനം. സീസണില്‍ പ്രമുഖ കിരീടങ്ങളൊന്നും ക്ലബിന് ലഭിക്കാത്തതും ചാംപ്യന്‍സ് ലീഗിന് യോഗ്യത നേടാന്‍ സാധിക്കാത്തതുമാണ് വാന്‍ ഗാലിന്റെ പുറത്താകലില്‍ കലാശിച്ചത്. യുനൈറ്റഡിന് ഏറ്റവും അനുയോജ്യനായ പരിശീലകനാണ് മൗറീഞ്ഞോയെന്ന് എക്‌സിക്യൂട്ടീവ് വൈസ് ചെയര്‍മാന്‍ എഡ് വുഡ്‌വാര്‍ഡ് പറഞ്ഞു. പല ക്ലബുകളിലായി നിരവധി കിരീടങ്ങള്‍ നേടാന്‍ മൗറീഞ്ഞോയ്ക്ക് സാധിച്ചിട്ടുണ്ട്. പ്രീമിയര്‍ ലീഗിലും അദ്ദേഹം കഴിവ് തെളിയിച്ചിട്ടുണ്ടെന്നും വുഡ്‌വാര്‍ഡ് കൂട്ടിച്ചേര്‍ത്തു. 

വര്‍ഷങ്ങളായി യുനൈറ്റഡിന് സുപ്രധാന നിര്‍ദേശങ്ങള്‍ നല്‍കാനും ക്ലബുമായി മികച്ച സൗഹൃദവും കാത്തുസൂക്ഷിക്കാനും മൗറീഞ്ഞോയ്ക്ക് സാധിച്ചിരുന്നു. ഇതാണ് ക്ലബിലേക്ക് അദ്ദേഹത്തിന് വാതില്‍ തുറക്കാന്‍ കാരണം. ടീമിന്റെ പരിശീലകനാകുന്നതില്‍ അതിയായ സന്തോഷമുണ്ടെന്ന് മൗറീഞ്ഞോ വ്യക്തമാക്കി.
കഴിഞ്ഞ ദിവസം യുനൈറ്റഡിന്റെ പെരുമാറ്റ ചട്ടങ്ങള്‍ മൗറീഞ്ഞോ അംഗീകരിച്ചിരുന്നു. കഴിഞ്ഞ സീസണില്‍ ചെല്‍സിക്ക് കിരീടം നേടിക്കൊടുത്ത മൗറീഞ്ഞോയെ ടീമിന്റ പ്രകടനം മോശമായതിനെ തുടര്‍ന്ന് കഴിഞ്ഞ ഡിസംബറിലാണ് ക്ലബ് പുറത്താക്കിയത്.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

Advt.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.