2023 December 02 Saturday
ബംഗാള്‍ ഉള്‍ക്കടലില്‍ ന്യൂനമര്‍ദ്ദം; സംസ്ഥാനത്ത് അടുത്ത അഞ്ച് ദിവസം മഴയ്ക്ക് സാധ്യത

പൂട്ടിക്കിടക്കുന്ന സ്വകാര്യ കശുവണ്ടി ഫാക്ടറികൾ വിറ്റുതുടങ്ങി തൊഴിലാളികളുടെ ആനുകൂല്യം അട്ടിമറിക്കുന്നു

   

രാജു ശ്രീധർ
കൊല്ലം
പ്രതിസന്ധിയെ തുടർന്ന് സംസ്ഥാനത്ത് പൂട്ടിക്കിടക്കുന്ന സ്വകാര്യ കശുവണ്ടി ഫാക്ടറികൾ കടബാധ്യതയെ തുടർന്ന് ഉടമകൾ വിൽക്കാൻ തുടങ്ങി. എന്നാൽ ഇവിടെ ജോലിചെയ്തിരുന്ന തൊഴിലാളികളുടെ ഗ്രാറ്റുവിറ്റി യുൾപ്പടെയുള്ള ആനുകൂല്യങ്ങൾ അട്ടിമറിക്കപ്പെടുകയാണ്.
സംസഥാനത്ത് 842 സ്വകാര്യ കശുവണ്ടി ഫാക്ടറികളിൽ നാനൂറിൽ അധികവും പൂട്ടിക്കിടക്കുകയാണ്. ഇതിൽ വലിയൊരു വിഭാഗം ഫാക്ടറികളും ബാങ്കുകളിൽ നിന്നുള്ള വായ്പാ കുടിശ്ശികയെ തുടർന്ന് ജപ്തി ഭീഷണി നേരിടുന്നുണ്ട്. ഇതിനെ തുടർന്നാണ് ഉടമകൾ വിൽപനയ്ക്ക് നീക്കം തുടങ്ങിയത്. കോടികൾ വിലമതിക്കുന്ന ഏക്കർ കണക്കിന് വസ്തുക്കൾ ഉള്ളതാണ് മിക്ക ഫാക്ടറികളും.
ഫാക്ടറി കെട്ടിടങ്ങൾക്ക് തന്നെ ഒരേക്കറോളം വിസ്തൃതി വരും.ജപ്തി ഭീഷണിയുടെ നിഴലിൽ ഫാക്ടറി വിറ്റ് കടം തീർക്കാനുള്ള നെട്ടോട്ടത്തിലാണ് ഉടമകൾ. ഇത് മുന്നിൽക്കണ്ട് മേഖലയിൽ റിയൽ എസ്റ്റേറ്റ് മാഫിയയും തലയുയർത്തിയിട്ടുണ്ട്.

വ്യവസായം തുടങ്ങാൻ മേഖലയിൽ നിന്നു പുതിയതായി ആരും മുന്നോട്ടു വരാത്തതിനെ തുടർന്ന് ഷോപ്പിങ് കോംപ്ലക്സുകൾക്കായുള്ള കച്ചവടവും തകൃതിയാണ്.
കൊല്ലം ജില്ലയിലെ കൊട്ടിയത്തെ ഒരു ഫാക്ടറി പ്രമുഖ ഭരണകക്ഷിയുടെ നേതൃത്വത്തിൽ സൊസൈറ്റി രൂപീകരിച്ച് വിലയ്ക്ക് വാങ്ങിയിരുന്നു.
എന്നാൽ വിൽക്കുന്ന ഫാക്ടറികളിലെ തൊഴിലാളികൾക്ക് ഉടമകളിൽ നിന്നു അർഹതപ്പെട്ട ഒരു ആനുകൂല്യവും ലഭിക്കുന്നില്ല. ട്രേഡ് യൂനിയനുകൾ ഇക്കാര്യത്തിൽ സർക്കാരിൽ സമ്മർദം ശക്തമാക്കണമെന്ന ആവശ്യമാണ് ഉയരുന്നത്.

പ്രതിസന്ധിയിലായ പരമ്പരാഗത വ്യവസായങ്ങളിലെ തൊഴിലാളികളെ സഹായിക്കാനായി ഉമ്മൻ ചാണ്ടി സർക്കാർ ധനസഹായ പദ്ധതികൾ ആവിഷ്കരിച്ചിരുന്നു. ഇതനുസരിച്ച് പ്രതിസന്ധിയിലായ വ്യവസായങ്ങളിലെ കൂലി വർധനവിന്റെ ബാധ്യത ഒഴിവാക്കാൻ, പ്രവർത്തിക്കുന്ന കയർ ഫാക്ടറി തൊഴിലാളികൾക്ക് ദിവസം 110 രൂപ വീതം നൽകുന്ന പദ്ധതിയാണ് നടപ്പാക്കിയിരുന്നത്.
അത് ഇന്നും തുടരുന്നുണ്ട്. 2016 ഫെബ്രുവരിയിലെ വർധനയ്ക്ക് ശേഷം കശുവണ്ടി മേഖലയിൽ ഇതുവരെ കൂലി വർധിപ്പിച്ചിട്ടില്ലെന്ന് തൊഴിലാളികൾ പറയുന്നു.
കയർ ഫാക്ടറി തൊഴിലാളികൾക്ക് നൽകുന്ന പോലെ, പ്രവർത്തിക്കുന്ന കശുവണ്ടി ഫാക്ടറികളിലെ തൊഴിലാളികൾക്കും നിശ്ചിത തുക സർക്കാർ കൂലിയായി ഏർപ്പെടുത്തണമെന്ന ആവശ്യം ശക്തമാണ്.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Comments are closed for this post.