2022 January 29 Saturday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

പുതിയ വോട്ടര്‍മാരില്‍ ആയിരങ്ങള്‍ പേരുചേര്‍ക്കാന്‍ ബാക്കി

അശ്‌റഫ് കൊണ്ടോട്ടി

മലപ്പുറം: നിയമസഭാ തെരഞ്ഞെടുപ്പ് വോട്ടര്‍പട്ടികയില്‍ പേരുചേര്‍ക്കാനുള്ള സമയ പരിധി നാളെ അവസാനിക്കാനിരിക്കെ തദ്ദേശ വോട്ടര്‍ പട്ടികയിലെ പുതിയ വോട്ടര്‍മാരില്‍ ആയിരങ്ങള്‍ പേരുചേര്‍ക്കാന്‍ ഇനിയും ബാക്കി. തദ്ദേശ തെരഞ്ഞെടുപ്പ് വോട്ടര്‍പട്ടികയിലെ പുതിയ വോട്ടര്‍മാര്‍ക്കു നിയമസഭാ തെരഞ്ഞെടുപ്പില്‍ വോട്ടുചെയ്യണമെങ്കില്‍ പുതിയ പട്ടികയില്‍ വീണ്ടും പേരുചേര്‍ക്കണം. എന്നാല്‍, ഇതിനുള്ള സമയ പരിധി ഈ മാസം 31ന് അവസാനിക്കുമെന്നിരിക്കെ ആയിരങ്ങളാണ് പേരുചേര്‍ക്കാന്‍ ബാക്കിയുള്ളത്.
കഴിഞ്ഞ തദ്ദേശ തെരഞ്ഞെടുപ്പില്‍ മൂന്നു ലക്ഷത്തിലേറെ പേരാണ് പുതിയ വോട്ടര്‍മാരായുള്ളത്. ഇവര്‍ക്കു പേരുചേര്‍ക്കാനുള്ള അവസരം, 2021 ജനുവരി ഒന്നിന് 18 വയസ് പൂര്‍ത്തിയാകുന്നവര്‍ക്ക് വോട്ട് ചെയ്യാനുള്ള അവസരം, വോട്ടര്‍പട്ടികയിലെ തെറ്റ് തിരുത്തല്‍, പുതിയ താമസസ്ഥലത്തേക്ക് പേര് ചേര്‍ക്കല്‍ തുടങ്ങിയവയ്ക്കാണ് തെരഞ്ഞെടുപ്പ് കമ്മിഷന്‍ കഴിഞ്ഞ മാസം 16 മുതല്‍ ഈ മാസം 31 വരെ അവസരം നല്‍കിയത്. എന്നാല്‍, തദ്ദേശ തെരഞ്ഞെടുപ്പും വന്നതോടെ നിയമസഭാ തെരഞ്ഞെടുപ്പ് വോട്ടര്‍പട്ടികയില്‍ പേരുചേര്‍ക്കാന്‍ കഴിയാതെവരികയായിരുന്നു. വോട്ടര്‍ ഐ.ഡി കാര്‍ഡ് ഉണ്ടായാലും തദ്ദേശ തെരഞ്ഞെടുപ്പിലെ കന്നിവോട്ടര്‍മാര്‍ വീണ്ടും നിയമസഭാ തെരഞ്ഞെടുപ്പില്‍ വോട്ട് ചെയ്യണമെങ്കില്‍ പുതിയ അപേക്ഷ നല്‍കണം.
തദ്ദേശ വോട്ടര്‍പട്ടികയില്‍ പുതിയ വോട്ട് ചേര്‍ക്കാന്‍ പാര്‍ട്ടികളും വ്യക്തികളും സജീവമായിരുന്നെങ്കിലും നിയമസഭാ തെരഞ്ഞെടുപ്പ് വോട്ടര്‍പട്ടികയില്‍ തണുപ്പന്‍ പ്രതികരണമാണ്. പുതിയ വോട്ടര്‍മാര്‍ക്കും ഇക്കാര്യത്തില്‍ അവഗാഹമില്ലാത്തതാണ് പേര് ചേര്‍ക്കാന്‍ വോട്ടര്‍മാര്‍ കുറയുന്നതെന്നു റവന്യൂ ഉദ്യോഗസ്ഥരും പറയുന്നു. നിയമസഭാ തെരഞ്ഞെടുപ്പ് വോട്ടര്‍പട്ടികയുടെ ചുമതല റവന്യൂ വകുപ്പിനാണ്. പുതിയ വോട്ടര്‍മാര്‍മാരുടെ അപേക്ഷകളിലെ ഹിയറിങ് ബ്ലോക്ക് ലെവല്‍ ഓഫിസര്‍മാര്‍ (ബി.എല്‍.ഒ) മാരാണ് പരിശോധിക്കുന്നത്. എന്നാല്‍, തദ്ദേശ തെരഞ്ഞെടുപ്പ് വോട്ടര്‍പട്ടികയുടെ ചുമതല പൂര്‍ണമായും ഗ്രാമപഞ്ചായത്ത് സെക്രട്ടറിമാര്‍ക്കായിരുന്നു. നിയമസഭാ വോട്ടര്‍പട്ടികയില്‍ ഉള്‍പ്പെട്ടാല്‍ തദ്ദേശ വോട്ടര്‍പട്ടികയിലും ഉള്‍പ്പെടുന്ന ഏകീകരണം വേണമെന്ന ആവശ്യം ശക്തമായിരിക്കുകയാണ്.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

Advt.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.