2020 September 29 Tuesday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

പമ്പയിലെ മണല്‍ വാരല്‍ വിജിലന്‍സ് അന്വേഷണ ഉത്തരവ് ഹൈക്കോടതി സ്റ്റേ ചെയ്തു

 
 
കൊച്ചി : പമ്പയിലെ മണല്‍ വാരല്‍ സംബന്ധിച്ച് വിജിലന്‍സ് അന്വേഷണത്തിന് ഉത്തരവിട്ട തിരുവനന്തപുരം വിജിലന്‍സ് കോടതി ഉത്തരവ് ഹൈക്കോടതി സ്റ്റേ ചെയ്തു. 
രണ്ടു മാസത്തേക്കാണ് സ്റ്റേ ഉത്തരവ് പുറപ്പെടുവിച്ചത്.  പ്രതിപക്ഷ നേതാവ് രമേശ് ചെന്നിത്തലയുടെ പരാതിയില്‍ വസ്തുതകള്‍ പരിശോധിക്കാതെയാണ് വിജിലന്‍സ്  അന്വേഷണത്തിന് ഉത്തരവിട്ടതെന്നു സര്‍ക്കാര്‍ ബോധിപ്പിച്ചു.  ജസ്റ്റിസ് വി.ജി അരുണാണ് ഇടക്കാല ഉത്തരവ് പുറപ്പെടുവിച്ചത്. പമ്പയിലെ മാലിന്യം നീക്കാന്‍ കരാര്‍ നല്‍കിയത് സ്വകാര്യ കമ്പനിക്കാണെന്ന ചെന്നിത്തലയുടെ വാദം തെറ്റാണെന്നും സര്‍ക്കാര്‍ ചൂണ്ടിക്കാട്ടി. കണ്ണൂരിലെ പൊതുമേഖലാ സ്ഥാപനമായ കേരള ക്ലേയ്‌സ് ആന്‍ഡ് സെറാമിക്‌സ് പ്രൊഡക്‌സ് ലിമിറ്റഡിനാണ് അടിഞ്ഞുകൂടിയ മണലും പ്ലാസ്റ്റിക് അടക്കമുള്ള മാലിന്യങ്ങളും നീക്കം ചെയ്യാന്‍ കരാര്‍ നല്‍കിയതെന്നു സര്‍ക്കാര്‍ ബോധിപ്പിച്ചു. പമ്പയിലെ ഒഴുക്ക് സുഗമമാക്കാനും വെള്ളപ്പൊക്ക ഭീഷണി ഒഴിവാക്കാനുമായിരുന്നു ഇതെന്ന് സര്‍ക്കാരിന് വേണ്ടി ഹാജരായ  സ്‌പെഷല്‍ പ്രോസിക്യൂട്ടര്‍ എ. രാജേഷ് കോടതിയെ അറിയിച്ചു. പമ്പയില്‍ നിന്ന് മണല്‍ നീക്കാന്‍ മാത്രമാണ് കരാറെന്നായിരുന്നു ചെന്നിത്തലയുടെ പരാതിയിലെ ആരോപണം. വനം വകുപ്പിന്റെ അനുമതിയില്ലെന്ന വാദവും തെറ്റാണെന്നു സര്‍ക്കാര്‍ വിശദീകരിച്ചു. ദുരന്തനിവാരണ നിയമത്തിലെ പ്രത്യേക വ്യവസ്ഥകള്‍ പ്രകാരം ജില്ലാ കലക്ടര്‍ കൈക്കൊണ്ട നടപടികളില്‍ വിജിലന്‍സ് അന്വേഷണത്തിന് ഉത്തരവിട്ട നടപടി നിയമാനുസൃതമല്ലെന്ന് ചൂണ്ടിക്കാട്ടി സര്‍ക്കാര്‍ സമര്‍പ്പിച്ച ഹരജി സ്വീകരിച്ചാണ് ഹൈക്കോടതിയുടെ ഇടക്കാല ഉത്തരവ്.
 

Advt.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.